विश्‍वभर आज : दिल्‍लीमा आम आदमी विजयी, कोरोना भाइरसबाट मृत्यु हुनेको संख्या एक हजार नाघ्यो

दिल्लीमा आम आदमी पार्टी विजयी

 

नयाँदिल्ली : भारतको दिल्लीमा भएको विधानसभा निर्वाचनमा अरबिन्द केजरीवाल नेतृत्वको आम आदमी पार्टी (आप)ले स्पष्ट बहुमत ल्याएको छ । भाजपाले जम्मा ६ सिट जितेको छ भने आपले मंगलबार दिउसोसम्म ५२ स्थानमा जित हासिल गरेको छ । साथै जारी मतगणनामा २ स्थानमा अगाडि रहेको छ ।

भाजपा भने ५ स्थानमा अगाडि देखिएको छ । यससँगै आपले दिल्लीमा तेस्रो पटक सरकार बनाउँदैछ । दिल्ली विधानसभामा सरकार गठन गर्न जम्मा ३६ सिट पर्याप्त छ । ७० सदस्यीय विधानसभाका लागि गत शनिबार मतदान भएको थियो । दिल्लीको सन्दर्भमा अघिल्लो चुनावमा भन्दा आपको ५ सिट कम आएको हो भने भाजपाको ५ सिट बढी आएको हो ।

साथै थप ८ सिट पनि जित्‍ने सम्भावना बलियो छ । दिल्ली विधानसभामा कंग्रेस भने यसपटक पनि शुन्यमै समेटिएको छ ।

अफगानिस्तानमा आत्मघाती हमला, तीन सैनिकसहित पाँचको मृत्यु

काबुल : अफगानिस्तानको काबुलस्थित रक्षा मन्त्रालयलाई लक्षित गर्दै भएको आत्मघाती आक्रमणमा पाँचजनाको मृत्यु भएको छ । ‘तीनजना सैनिकसहित पाँचजनाको मृत्यु भएको छ । दुईजना आम नागरिक हुन्,’ मन्त्रालयका प्रवक्ता नसरत रहिमीले अन्तर्राष्ट्रिय मिडियालाई बताएका छन् ।

विस्फोटमा १२ जना घाइते छन् । जसमध्ये पाँचजना सर्वसाधारण हुन् । सैनिक प्रशिक्षालयको गेटमै हमला भएको थियो । ‘मर्सल फहिम मिलिटरी एकेडेमी’को गेट नजिकै हमला भएको बताइएको छ ।

प्रत्यक्षदर्शीहरुका अनुसार त्यहाँ नजिकैका घर नै हल्लाउने गरी शक्तिशाली विस्फोट भएको थियो । विस्फोटपछि गोली प्रहारको आवाज सुनिएको स्थानीयबासीले जनाएका छन् । विस्फोटको जिम्मेवारी अहिलेसम्म कुनै पनि समूहले लिएको छैन । अफगानिस्तानका ग्रामिण स्थानमा तालिबान समूह सक्रिय रहँदैआएको छ ।

रोहिंग्या शरणार्थी चढेको डुंगा पल्टिँदा १५ को मृत्यु

ढाका : बंगलादेशमा रोहिंग्या समुदायका शरणार्थी चढेको डुंगा पल्टिँदा १५ जनाको मृत्यु भएको छ । अरु दर्जनौं हताहत भएका छन् । काठको डुंगामा चढेर १ सय ३० रोहिंग्या शरणार्थीहरु बंगालको खाडी हुँदै मलेसिया तर्फ जाँदै थिए ।

तट रक्षक प्रवक्ता हमिदुल इस्लामका अनुसार ७० जना मानिसको उद्धार भएको छ । बंगलादेशमा १० लाखजति रोहिंग्या शरणार्थीहरु आश्रय लिएर बस्दैआएका छन् । रोहिंग्या शरणार्थीहरुका लागि मलेसिया सुरक्षित बासस्थान मानिन्छ ।

भारतमा हार्दिक पटेल पक्राउपछि पत्नीको गुनासो : पतिलाई वेपत्ता गरियो !

नयाँदिल्ली : भारतको गुजरातस्थित कांग्रेसका युवा नेता हार्दिक पटेललाई गत जनवरी १८ मा प्रहरीले गिरफ्तार गरेको थियो । देशद्रोहको मुद्दा लगाएर उनलाई प्रहरीले पक्राउ गरे पनि परिवारलाई यसबारे औपचारिक रुपमा जानकारी दिएको छैन ।

हार्दिककी पत्नीले आफ्ना पति वेपत्ता भएको प्रतिक्रिया दिएकी छन् । गत १८ जनवरीदेखि आफ्ना पतिको कुनै खोजखबर नभएको हार्दिककी पत्नीले बताएकी हुन् । हार्दिककी पत्नीका अनुसार पहिले प्रहरी बारम्बार घरमा आएर ‘हार्दिक कहाँ छन् ?’ भन्दै सोध्ने गर्थे ।

हार्दिक पत्नी किन्जलले कांग्रेस पार्टीद्वारा आयोजित कार्यक्रममा प्रहरीमाथि गम्भीर आरोप लगाएकी हुन् । किन्जलले भनिन्, ‘१८ जनवरीमा गिरफ्तार भएपछि उनको बारेमा केही जानकारी छैन । हामीलाई केही थाहा छैन उनी कहाँ छन् ।’

कोरोना भाइरसबाट मृत्यु हुनेको संख्या एक हजार नाघ्यो

बेइजिङ : चीनमा महामारीकै रुप लिएको कोरोना भाइरसबाट एक हजार भन्दा धेरैको मृत्यु भइसकेको छ । सोमबार मात्रै एक सय ८ जनाको मृत्यु भयो । जुन सबैभन्दा धेरै एकै दिन मृत्यु भएको तथ्यांक हो ।

अहिलेसम्म मृत्यु हुनेको संख्या एक हजार १६ पुगेको छ । साथै ४२ हजार ६ सय ३८ जनामा संक्रमण देखिएको छ । चीनको वुहानबाट सुरु कोरोना भाइरसको संक्रमण विश्वका २७ देशमा फैलिसकेको छ ।

अमेरिकी राष्ट्रपति ट्रम्प भारत भ्रमणमा आउँदै

नयाँदिल्ली : अमेरिकी राष्ट्रपति डोनल्ड ट्रम्प यही फेब्रअरीमा भारत भ्रमणमा आउने भएका छन् । भारतीय अधिकारीहरुले यसबारे जानकारी दिएका हुन् । हालै जारी गरिएको विज्ञप्ति अनुसार ट्रम्प यही फेब्रुअरी २४ गते दुई दिने भ्रमणका लागि भारत आउने कार्यक्रम छ ।

ट्रम्पसँगै उनी पत्नी मेलानिया पनि आउने बताइएको छ । भारतमा छँदा उनीहरुले गुजरातको अहमदाबाद भ्रमण गर्ने तालिका छ । ट्रम्पले यसअघि कश्मीरको विषयमा पाकिस्तानसँग मध्यस्तता गर्नुपर्ने भए आफू तयार रहेको प्रतिक्रिया दिँदैआएका छन् । पाकिस्तानी प्रधानमन्त्री इमरान खानले भने ट्रम्पसँगको भेटमा मध्यस्तता गर्न आग्रह गर्दैआएका थिए ।