काठमाडौँ: १० जना किशोरीले दुई हप्तामै फिल्म तयार गरेका छन् । किपालय प्रडक्सनले प्लान इन्टरनेसनलको ‘गर्ल्स गेट इक्वेल’अभियान अन्तर्गत फिल्म मेकिङ कार्यशालामा भाग लिएका १० किशोरीले दुई हप्तामा नै फिल्म बनाएका हुन् ।
एक महिना सिकेकै भरमा उनीहरुले फिल्म बनाएका हुन् । शुक्रबार नेपाल चलचित्र विकास बोर्डको हलमा उनीहरूले बनाएका ५ फिल्म प्रदर्शन गरेका थिए ।
‘वुमन मेक फिल्मस्’शीर्षकमा गरिएको यो तालिमलाई अस्कर इन्टरनेसनल कलेज र विकास बोर्डले पनि सहयोग गरेका थिए ।
नेपाली फिल्महरूमा महिलाको चरित्र चित्रण अस्वभाविक र यथास्थितिवादी रहेको टिप्पणी हुने गरेको आयोजक किपालयले बताएका छन् । महिला सम्बन्धी थुप्रै ‘स्टेरियोटाइप’चिर्न र फिल्मनिर्माणमा महिलाको संख्या बढाउने उद्देश्यले कार्यशाला गरेको आयोजक किपालयको भनाइ छ ।
किपालयकी प्रोजेक्ट हेड आश्मा पोखरेलले कार्यशालाका लागि देशभरबाट आवेदनमा गरेकी थिइन् । कार्यशालाका प्रोजेक्टको अर्डिनेटर नवविजय श्रेष्ठले सैद्धान्तिक र प्रायोगिक दुवै विधिको प्रयोग गरी किशोरीलाई फिल्म मेकिङमा दीक्षित गर्ने प्रयास गरेका थिए ।
एक महिना लामो तालिम आफैँमा प्रगतिशील दृष्टिकोण भएको जहाँ १८ देखि २४ वर्षसम्मका किशोरीले नेपाली समाजको बनावटमाथि रचनात्मक प्रश्न गर्ने शिल्प सिकेको श्रेष्ठले बताए । यी पाँच चलचित्रको प्रदर्शनले महिला चलचित्रकर्मीलाई आफ्नो क्षमता देखाउन राम्रो मञ्ंच प्रदान गर्नुका साथै आत्मविश्वासी बनाएको उनले भने ।
कार्यशालामा आश्रुती त्रिपाठी, प्राधान्या योञ्जन, एन्जला चौधरी, पुष्पा जोशी, पूर्णिमा महर्जन, अम्बिका भण्डारी, अस्मितालावती, श्रीषा कुँवर, मीरा खड्का र ज्योति बेलबासे सहभागी थिए । कार्यशालामा १० किशोरीले प्राविधिक ज्ञान मात्र नभएर, महिलासँग जोडिएका सामाजिक तथा घरेलु मुद्दालाई कसरी पर्दामा उतार्ने भन्नेबारे पनि ज्ञान लिएका थिए । १० जनाले ५ समूहमा विभक्त भई बनाएका फिल्ममा उनीहरूले ५ फरक महिलाको जिन्दगीलाई फिल्मको आकार दिएका थिए ।
यौनकर्मीको कथामा फिल्म बनाएकी पुष्पा जोशीले कार्यशालाले आफूलाई फिल्म बनाउने कला मात्र नसिकाएर महिलाका मुद्दालाई लेन्सको आँखाले कसरी हेर्न सकिन्छ भन्ने पनि ज्ञान दिएको बताइन् ।
उनीहरूलाई राजन कठेत, रजिला श्रेष्ठ, बबिन दुलाल लगायतले प्रशिक्षण दिएका थिए । किशोरीलाई प्रशिक्षण दिएका राजन कठेतले कार्यशालाले फिल्म बनाउने सीपसँगै किशोरीमा समाजसँग घुलमिल हुने गुणको पनि विकास गराएको धारणा राखेका थिए ।
प्रतिक्रिया दिनुहोस !
