काठमाडौं : नेकपा (एमाले)का पोलिटब्यूरो सदस्य तथा पूर्वमन्त्री महेश बस्नेतले सभामुख अग्निप्रसाद सापकोटाविरुद्ध महाभियोगको प्रस्ताव पनि दर्ताको तयारी भइरहेको बताएका छन् ।
मंगलबार राजधानीमा आयोजित साक्षात्कारमा बस्नेतले सभामुखविरुद्ध महाभियोग आउने परिस्थिति सिर्जना हुन लागेको बताए । महाभियोग कांग्रेसले पनि चाहेको र सदनलाई सूचारु गर्ने कुरामा एउटा सेफ ल्याण्डिङका रुपमा प्रयोग गर्नेगरी परिस्थिति बनेको उनको दाबी छ ।
यद्यपि एमालेले अहिलेसम्म कुनै ठोस निर्णय नगरिसकेको भन्दै बस्नेतले महाभियोगको परिस्थिति भने बन्दै गएको जिकिर गरे ।
नेता बस्नेतले सभामुखविरुद्ध महाभियोग प्रस्ताव अघि बढाउन आफूहरु सय जना सांसद जुनसुकै बेला हस्ताक्षर गर्न तयार रहेको पनि स्पष्ट पारे । 'हामी सय जना स्ट्याण्डबाई छौं। जुनबेला पनि सही गर्न तयार नै छौं । त्यसलाई संख्या पुर्याउने कुरामा एमालेले पहल गरेर त्यो परिस्थिति सिर्जना गर्यो भने त्यो हुन पनि सक्छ ।'
सभामुखले संसदमा दलीयभन्दा अभिभावकको भूमिका खेल्नुपर्नेमा नेता बस्नेतले जोड दिए । सभामुखसामू तीन विकल्प रहेको उनको तर्क छ । ‘पहिलो विकल्प भनेको हामीले कारबाही गरेका सांसदहरुको कारबाही पत्र सदर गर्ने, अनि दोस्रो विकल्प भनेको आफ्नो पदबाट राजीनामा दिएर परिस्थिति सहजीकरण गर्ने र तेस्रो विकल्प भनेको अदालतले छिटो फैसला गर्ने हो । यो भन्दा फरक विषय एमालेले अहिले सोचेको छैन । यी तीन कुरा नभएसम्म संसदमा एमालेको अवरोध कायमै रहन्छ,' उनले भने ।
वैशाख ३० गते स्थानीय तहको निर्वाचन गर्ने सरकारी निर्णयको स्वागत गर्दै बस्नेतले एमालेले कसैसँग पनि गठबन्धन नगर्ने दाबी गरे । आफ्नो पार्टीको भविष्य अन्धकार देखेको कारण प्रचण्ड र माधव नेपालले स्थानीय तहको निर्वाचन टार्ने षड्यन्त्र गरेको उनले आरोप लगाए ।
प्रतिक्रिया दिनुहोस !
