वैद्यले सोधे, ‘एमसीसी किन टेबल गरेको ?’ प्रचण्डको जवाफ: अब मत दिँदैनौं

काठमाडौं : नेकपा माओवादी केन्द्रका अध्यक्ष पुष्पकमल दाहाल 'प्रचण्ड' र नेकपा (क्रान्तिकारी) माओवादीका महासचिव मोहन वैद्य किरणबीच खुमलटारमा भेटवार्ता भएको छ ।

भेटमा वैद्यले अमेरिकी सहायता परियोजना एमसीसीबारे चासो राखेका थिए । उनले एमसीसी राष्ट्रको हितमा नभएको भन्दै पारित गर्न नहुने बताए । राष्ट्रहित विपरीत सम्झौता किन टेबल  गरेको भनेर प्रचण्डसँग चासो राखेको वैद्यको सचिवालयले जनाएको छ । 

जवाफमा अध्यक्ष प्रचण्डले एमसीसी संसदमा टेबल भए पनि मतदान नगर्ने बताएका थिए । उनले भने, ‘एमसीसी टेबल नगर्ने भन्दा भन्दै टेबल गरे । अब भोट हाल्दैनौं भनेका छौं ।’

भेटमा वैद्यले एमसीसी विरुद्धको प्रदर्शनका क्रममा पक्राउ परेका कार्यकर्ता रिहा गर्न पनि प्रचण्डसँग अनुरोध गरेका थिए । (क्रान्तिकारी) माओवादीका नेताद्वय बसन्त बोगटी र सुनिता बुढाथोकी प्रहरी हिरासतमा छन् । वैद्यले विज्ञप्ति जारी गरेर कार्यकर्ता रिहा गर्न सरकारसँग माग गरेका छन् । 

वैद्यले जारी गरेको वक्तव्यमा भनिएको छ, 'अमेरिकी हिन्द–प्रशान्त रणनीतिको अभिन्न अंग रहेको राष्ट्रघाती एमसीसी परियोजना खारेजीको माग गर्दै हाम्रो पार्टी लगायत ६ वटा कम्युनिस्ट पार्टी र २ ओटा मोर्चाको संयुक्त आह्वानमा गत फागुन ८ गने आयोजना गरिएको शान्तिपूर्ण नेपाल बन्द कार्यक्रमको सन्दर्भमा गिरफ्तार गरिएका हाम्रो पार्टीका केन्द्रीय सदस्य बसन्त बोगटी र  सुनिता बुढाथोकीलगायत अन्य विभिन्न पार्टीसँग आबद्ध दर्जनौं कार्यकर्तालाई कथित अभद्र व्यवहारको झुट्टा मुद्दा लगाई देउवा नेतृत्वको गठबन्धन सरकारले जेल चलान गर्ने कुचेष्टा गरेको छ । अमेरिकी साम्राज्यवादलाई खुसी पार्न गरिएको यस प्रकारको अनैतिक र पूर्वाग्रही कामको हाम्रो पार्टी घोर निन्दा तथा भत्र्सना गर्दछ र उहाँहरुमाथि लगाइएका झुट्टा मुद्दाको खारेजी गरी उहाँहरुको अविलम्ब एवम् निशर्त रिहाइका लागि जोडदार माग गर्दछ ।’