राष्ट्रिय स्वतन्त्र र जनमत पार्टी पहिलो पटक संसद छिर्दै, १२ दलको प्रतिनिधित्व
मंसिर २५, २०७९ आइतबार १६:५५:०
काठमाडौंः संघीय संसदको आकारले पूर्णता पाएको छ। प्रतिनिधिसभातर्फ प्रत्यक्ष र समानुपातिक निर्वाचनको अन्तिम मतपरिणाम सार्वजनिक भएसँगै संसदको आकारले पूर्णता पाएको हो ।संसदमा सात राजनीतिक दलले राष्ट्रिय मान्यता पाएका छन् भने १२ राजनीतिक दलको प्रतिनिधित्व हुनेछ ।
नेपाली कांग्रेस, नेकपा एमाले, नेकपा माओवादी केन्द्र,राष्ट्रिय स्वतन्त्र पार्टी, राष्ट्रिय प्रजातन्त्र पार्टी, जनता समाजवादी पार्टी, नेपाल जनमत पार्टी राष्ट्रिय पार्टी बनेका छन् । यसमध्ये राष्ट्रिय स्वतन्त्र पार्टी र नेपाल जनमत पार्टी नयाँ राजनीतिक दलका रुपमा उदाएका छन् ।
संसदको सबैभन्दा ठूलो दल नेपाली कांग्रेस बनेको छ । कांग्रेसले प्रत्यक्ष र समानुपातिक गरी ८९ सिट जितेको छ । प्रत्यक्षतर्फ ५७ र समानुपातिकतर्फ ३२ सिट जितेर संसदको ठूलो दल बनेको छ ।
यस्तै, नेकपा एमाले संसदमा प्रतिनिधित्व गर्ने दोस्रो ठूलो दल बनेको छ । एमालेले प्रत्यक्षतर्फ ४४ र समानुपातिकमा ३४ गरी कुल ७८ सांसद बनेका छन् ।
माओवादी केन्द्रका ३२ सांसदले संसदमा प्रतिनिधित्व गर्नेछन् । माओवादीबाट प्रत्यक्षमा १८ र समानुपातिकमा १६ गरी ३२ सांसद संसदमा सहभागी हुनेछन् । तीमध्ये महेन्द्र राय यादव नेपाल समाजवादी पार्टीका हुन् । उनले माओवादी केन्द्रको चिन्ह हंसिया हथौडा लिएर निर्वाचन जितेका हुन् ।
राष्ट्रिय स्वतन्त्र पार्टीका २० जना, राष्ट्रिय प्रजातन्त्र पार्टीका १४ जना सांसदले संसदमा प्रतिनिधित्व गर्नेछन् । रास्वपबाट ७ सांसद प्रत्यक्ष र १३ सांसद समानुपातिकतर्फ चुनिएका छन् । राप्रपाबाट ७ जना प्रत्यक्ष र ७ जना समानुपातिकतर्फ निर्वाचित भएका छन् ।
जनता समाजवादी पार्टीका १२ जना, नेपाल जनमत पार्टीका ६ जनाले संसदमा सहभागी जनाउनेछन् । जसपाबाट ७ जना प्रत्यक्ष र ५ जना समानुपातिक तर्फबाट समेटिएका छन् । नेकपा एकीकृत समाजवादीका १० जना सांसदले प्रतिनिधित्व गर्नेछन् ।
नागरिक उन्मुक्ति पार्टीका ३ जना, स्वतन्त्र तर्फका ५ जना, नेपाल मजदुर किसान पार्टी र राष्ट्रिय जनमोर्चाका १/१ जनाले संसदमा प्रतिनिधित्व गर्नेछन् ।
प्रतिक्रिया दिनुहोस !
