काठमाडौं : राष्ट्रिय स्वतन्त्र पार्टी (रास्वपा) ले पार्टीको निर्वाचन आयोग, लेखा आयोग र अनुशासन आयोग गठन गरेको छ । महाधिवेशनपछि पार्टी कार्यालय बनस्थलीमा बसेको रास्वपाको पहिलो केन्द्रीय समिति बैठकले महाधिवेशनबाट अनुमोदन भएको विधान अनुसार पार्टीका तीन वटा आयोगहरू गठन गरिएको रास्वपा महामन्त्री विपिन आचार्यले जानकारी दिए ।
उनले निर्वाचन आयोग र लेखा आयोगको पुरानो संरचना भङ्ग गरी यसअघि नै जिम्मेवारीमा रहेकाहरुलाई पुनः जिम्मेवारी दिइएको बताए । त्यस्तै अनुशासन आयोगको प्रमुखमा उच्च अदालत कास्कीका पूर्व न्यायाधीश समेत रहेका लेखनाथ पौडेललाई मनोनित गरिएको महामन्त्री आचार्यले जानकारी दिए ।
बैठकमा अन्य पदाधिकारीको मनोनयनको बिषयका कुनै छलफल नभएको उनले बताए । बाँकी पदाधिकारीको मनोनयन पार्टी सभापतिको विशेषाधिकार भएकाले, सभापतिको निर्देशन र तयारी अनुसार आगामी बैठकहरुबाट अघि बढ्ने उनको भनाइ छ । साथै बैठकले पहिलो महाधिवेशनलार्ई सफल पार्न सहयोग गर्ने तत्कालीन पदाधिकारी, प्रतिनिधि, सदस्य, सुरक्षाकर्मीलगायत सवैलाई धन्यवाद प्रस्ताव पारित गरेको महामन्त्री आचार्यले जानकारी दिए ।
प्रतिक्रिया दिनुहोस !
