ब्रसेल्स : बेल्जियमलाई फुटबलको एउटा एकेडेमीभन्दा पनि फरक पर्दैन । बेल्जियमले आफ्नो मात्रै हैन, अन्य देशबाट पनि प्रतिभा छानेर अन्तर्राष्ट्रिय फुटबललाई थुप्रै उत्कृष्ट फुटबलर दिएको छ । फुटबलको यही वातावरणले बेल्जियमको राष्ट्रिय टोलीलाई सदाबहार र उत्कृष्ट मानिन्छ । बेल्जियम फिफा वरीयतामा पनि प्राय: शीर्ष पाँचभित्रै रहने गर्छ । तर, यही टोली अन्तर्राष्ट्रिय ठूला प्रतियोगितामा भने उपाधिको नजिक पनि पुग्न सक्दैन ।
बेल्जियम सन् १९३० यता १३औं पटक विश्वकपमा सहभागी हुँदैछ । तर, बेल्जियमले सन् १९८६ मा चौथो स्थान हात पार्नुबाहेक विश्वकपमा त्योभन्दा ठूलो नतिजा हात पार्न सकेको छैन । बेल्जियमले विश्वकपमा त्यही एकपटक सेमिफाइनलमा प्रतिस्पर्धा गरेको थियो । त्यसयता बेल्जियम क्वार्टरफाइनलभन्दा अगाडि बढ्न सकेको छैन । बेल्जियम सन् २०१४ मा ब्राजिलमा भएको २०औं संस्करणमा अर्जेन्टिनासँग पराजित हुँदै क्वार्टरफाइनलबाट बाहिरिएको थियो । त्यसपछि सन् २०१६ मा भएको युरोकपमा पनि वेल्ससँग ३-१ ले पराजित हुँदै क्वार्टरफाइनलबाटै घर फर्कियो ।
त्यसैले रुस विश्वकपमा बेल्जियममाथि आफ्नो यही खराब इतिहासलाई सुधार्नु पर्ने चुनौती रहेको छ । रुस विश्वकपका लागि घोषित अन्तिम २३ खेलाडी र विश्वकप छनोटदेखि पछिल्लो मैत्रीपूर्ण खेलसम्म देखाएको लयलाई हेर्दा बेल्जियम यसपटक हरेक चुनौती पार गर्न सक्षम देखिएको छ । बेल्जियमको वर्तमान टोली पछिल्लो पुस्ताका उत्कृष्ट खेलाडीले भरिएको छ । टोलीमा एकजना घरेलु लिग र दुईजना चिनियाँ लिग खेल्ने खेलाडी छन् । अन्य २० जना भने युरोपियन लिगमा खेलिरहेका खेलाडी छन् । टोलीमा इङ्लिस प्रिमियर लिग क्लबबाट खेल्ने मात्रै ११ जना खेलाडी छन् ।
बेल्जियम सम्भवत: ३० मध्ये २८ अंक हात पार्दै रुस विश्वकपका लागि छनोट पक्का गर्ने एकमात्र युरोपियन टोली पनि हो । बेल्जियमले छनोट चरणमा ग्रिससँग १-१ को बराबरीसहित अंक बाँड्योे भने अन्य सबै खेलमा जित हात पारेको थियो । त्यसपछि विश्वकपको तयारी स्वरूप खेलिएको खेलमा पनि बेल्जियमले शतप्रतिशत नतिजा निकालेको छ । विश्वकप छनोटपछि खेलिएको पाँच मैत्रीपूर्ण खेलमा बेल्जियमले पराजय बेहोरेको छैन । बेल्जियमले जापानलाई १-०, साउदी अरेबियालाई ४-० र इजिप्टलाई ३-० ले पराजित गरेको थियो । बेल्जियमले मेक्सिकोसँग ३-३ र पोर्चुगलसँग गोलरहित बराबरी खेलेको थियो । पराजित नहुने आफ्नो यही लयलाई कायम राख्न सकेमा बेल्जियमले आगामी विश्वकपमा उपाधिसम्मको यात्रा तय नगर्ला भन्न सकिन्न ।
बेल्जियमको टोली
गोलरक्षक : थिबउट कोर्टियस (चेल्सी), सिमोन मिग्नोलेट (लिभरपुल) र कोइन क्यास्टिल्स (उल्फसबर्ग) ।
रक्षक : टोबी अल्डरवेइरेल्ड (टोट्टानहाम), थोमस भर्मेइलिन (बार्सिलोना), भिनसेन्ट कोम्पनी (म्यानचेस्टर सिटी), जन भर्टाेङ्घन (टोट्टनहाम), थोमस मुनियर (पीएसजी), डेड्रिक बोयटा (सेल्टिक) र लिन्डर डेन्डोन्कर (एन्डरलेच) ।
मिडफिल्डर : एक्सेल विसल (तियानजिन क्वान्जियन), केभिन डी ब्रुन (म्यानचेस्टर सिटी), मारउनी फेलाइनी (म्यानचेस्टर युनाइटेड), यान्निक कारास्को (डालियन विफाङ), थोर्गन हाजार्ड (बोरुसिया मोचेनग्लाबाच), युरी टाइलम्यान्स (एएस मोनाको), मोउसा डेम्बेल (टोट्टनहाम) र नासिर चाड्ली (वेस्ट ब्रोमविच) ।
स्ट्राइकर : अदनान जानुजाज (रियल सोसिडाड), रोमेलु लुकाकु (म्यानचेस्टर युनाइटेड), ड्राइज मेर्टन्स (नेप्लेस), मिची बात्सुयी (बोरुसिया डर्टमन्ड) र इडेन हाजार्ड (चेल्सी) ।
प्रशिक्षक : रोबर्टो मार्टिनेज
बेल्जियमको खेल
समूह ‘जी’
जुन १८ : पानामाविरुद्ध
जुन २३ : ट्युनिसिया
जुन २८ : इङ्ल्यान्डविरुद्ध
बेल्जियम
विश्वकप सहभागिता : १३औं पटक
उपलब्धि : चौथो स्थान (सन् १९८६)
फिफा वरीयता : ३
प्रतिक्रिया दिनुहोस !
