अत्यधिक गर्मीले आमाको मृत्यु, ६ महिने शिशुसहित पाँच सन्तानको बिचल्ली
जेठ २७, २०७५ आइतबार १६:३९:०
बर्दिबासः अध्यधिक गर्मीले गौशाला नगरपालिका–८ बेलगाछीमा ६ महिने शिशुकी आमाको मृत्यु भएको छ । मृत्यु हुनेमा गौशाखा नगरपालिका–८ बेलगाछीकी करिब ३५ वर्षीय शिकिल देवी सादा मुसहर रहेको इलाका प्रहरी कार्यालय गौशालाका प्रहरी निरीक्षक भोला भट्टले जनाए । मृतकका पाँच सन्तान छन् । कान्छो छोरो ६ महिनाका छन् ।
मृतकको शवको पोष्टमार्टमको लागी जिल्ला अस्पताल जलेश्वर पठाइएको छ । गर्मीले शिकिल देवीकी सासू ५५ वर्षीया सुनर (सोनर) देवी सादा मुसहर र उनकी छिमेकी २५ वर्षीया किसुन देवी सादा मुसहर बेहोस भएर अस्पताल भर्ना गरिएको छ ।
गौशालास्थित प्राथमिक स्वास्थ्य उपचार केन्द्रमा उपचार भइरहेका उनीहरुको स्वास्थ्य अवस्था सुधारोन्मुख रहेको उपचारमा संलग्न डा. मनोज दासले जनाए । गर्मीका कारणले उनीहरु बेहोस भएको डाक्टर दासले जनकारी दिए ।
यसरी मृत्यु भयो शिकिलको
आइतबार बिहानै गरिव परिवारकी सोनर देवी पाँचजना महिलाको समुहमा धान रोप्न गाउँकै उमेश महतोको खेतमा गएका थिए । एकाबिहानैदेखि चर्को घाम लागेको थियो ।
आइतबार बिहानै चर्को घाम लागेको थियो । धान रोप्दै गरेकी सोनर देवीलाई चक्कर आयो । उनी बेहोस् परिन् । त्यसपछि उनलाई खेतको आगीमा पानी छम्केर उनकी बुहारी शिकिलले बसाइन् । घान रोप्दै गरेकी अर्की सोनरकी छिमेकी किसुनदेवी सादा मुसहर पनि धान रोप्दै गर्दा गर्मीले बेहोस् परिन् ।
स्थानीय रेडियोकर्मी दिनेश महतोका अनुसार, शिकिलले सासु र छिमेकी विरामी परेको खबर पुर्याउन खेत भन्दा १ किलो मिटरको दुरीमा रहेको आफ्नो घर दगुरेर गइन् । घरमा सासू विरामी भएको बताइन् । घरका सदस्यहरु मोटरसाइकल लिएर बेहोस भएकी सोनरलाई उपचार गर्न धान खेततिर लागे ।
मोटरसाइकलको पछि पछि फेरि शिकिलपनि लागिन् । मोटरसाकल स्पिडमा गयो । उनी मोटरसाइकलपछि दु्रतगतिमा जाँदा बेहोस भएर उनी बाटोमा लडिन् । त्यसपछि उनको मृत्यु भएको थियो । आइतबार बिहानैदेखि महोत्तरीसहित जनकपुर आसपासमा ४० डिग्री तापक्रम थियो । अत्यधिक गर्मीले मध्य तराईको जनजीवन पनि प्रभावित बनेको छ ।
६ महिने शिशुको विच्चली
मृत्क शिकिलदेवी सादा मुसहरको अवस्था दयनीय छ । उनका पाँच सन्तान छन् । कान्छो छोरो ६ महिनाका काखे शिशु छाडेर ज्याला मजदुरीमा धान रोप्न गएकी थिइन् । उनका श्रीमान् रघरनाथ सादा मुसहर घरपरिवार पाल्न शनिबार मात्रै पञ्जाव गएका छन् । ६ महिने बच्चाकी आमाको अत्यधिक गर्मीले मृत्यु भएपछि काखे बच्चासहित अरु बालक टुहुरा भएका छन् ।
प्रतिक्रिया दिनुहोस !
