प्रदेश संसदमा बिजुली गायब, माननीय हैरान, माइक-पंखा पनि बन्द
जेठ २८, २०७५ सोमबार २०:३९:०
विराटनगरः प्रदेश १ को बजेट अधिवेशन जारी छ । सरकारले ल्याएको नीति तथा कार्यक्रममाथि छलफल आठौँ बैठकबाट सुरु भएको छ । यसमाथि गर्मागार्मी बहस चलिरहँदा सोमबारको बैठक निकै सकसपूर्ण र रोमाञ्चकसमेत बन्न पुग्यो ।
बिजुली ट्रिप खाने समस्याका कारण संसद बैठक निकै अव्यवस्थित बन्न पुग्यो । बिजुली जाने र आउने क्रमले कांग्रेस सांसद लोकप्रसाद संग्रौलाले आफ्नो धारण राख्दै गर्दा दुई पटक बिजुली गयो ।
तर, रोस्ट्रममा रहेका संग्रौलाले मन्तब्य राख्न छाडेनन् । माइक बन्द भयो । पंखा चलेनन् तर संग्रौलालाई सभामुख प्रदीपकुमार भण्डारीले उपलब्ध गराएको पन्ध्र मिनेटको पूरापुर सदुपयोग गरे । उनी बोलिरहे लाइन आयो, माइक बज्यो तर फेरि भोल्टेज गयो, माइक सुनिएन ।
गर्मीका कारण संसदभित्र माननीयलाई निकै सकस भएको सहजै महसुस गरिएको थियो । एसी चलेका थिएनन् भने पंखाको घुमाइ निकै धिमा थियो । गर्मीले गलेका सांसदहरु नीति तथा कार्यक्रमलो किताबले हम्किरहेका थिए ।
कतिपय सांसदले भने ब्याट्रीवाला सानो पंखा बोकेर गएका थिए । त्यसैले काम चलाई रहेका थिए । संसद सचिवालय बाहिरको ट्रान्समिटरमा आएको समस्याले बिजुलीले ट्रिप खाने समस्या भएपछि त्यसको असर सदनमा समेत परेको थियो । यस विषयमा संसद सचिवालयले नेपाल विद्युत् प्राधिकरणलाई पत्राचार गरी समस्या समाधान गर्न आग्रह गरेको छ ।नेकपाका सांसद सर्वध्वज साँवा रोस्ट्रममा आफ्नो धारणा राख्न आएपछि भने माहौले एकाएक रोमाञ्चित बन्न पुग्यो । गर्मीले थाकेका सांसदको मुहारमा मुस्कान छायो । सावाँले निकै विनोदपूर्ण र रशिक ढंगले आफ्नो धारणा राखे ।
उनले नीति तथा कार्यक्रमलाई ३२ लक्ष्यणले युक्त महिलासँग तुलना गर्दै सबै कार्यक्रम राम्रा भएको भन्दै समर्थन गरे । उनले आफ्नै शैलीमा हसाउँदै धारणा राखिरहँदा सभामुख प्रदीपकुमार भण्डारीले समय सकिएको भन्दै रुलिङ गरेपछि साँवाले फेरि आफ्नै शैलीमा धन्यवाद भन्दा संसद भवन हाँसोको फोहरा छुट्यो ।
धेरै बोल्नेलाई रातो बत्ती
सोमबारको बैठकमा सभामुख प्रदीपकुमार भण्डारीले रुलिङ गर्दै नीति तथा कार्यक्रममा सहभागी सांसदलाई सचेत गराए । उनले समय सकिएपछि सांसदलाई बोल्न दिएनन् । नेकपाकी खिनुलिम्बा लिम्बूको समय सकिएपछि पहिलो पटक रातोबत्ती बाल्दै समय सकिएको घोषणा गरे ।
बत्ती बलेपछि लिम्बू अलमलमा परिन् । धारणा राखेपछि धन्यवादसमेत भन्न भुलिन् अनि रोस्ट्रमबाट बाहिर आइन । सांसदलाई समय सकिएपछि विगतजस्तो अटेर गर्दै समय लिँदै लम्ब्याउन नदिन सभामुख भण्डारी निकै सचेत देखिएका थिए ।
प्रतिक्रिया दिनुहोस !
