जनकपुरधामः लगातारको वर्षाले प्रदेश २ को राजधानी जनकपुर जलमग्न भएको छ । अत्याधिक वर्षापछि नगरका अधिकांश सडक जलमग्न र हिलाम्य भएका छन् ।
सडक र ढल निर्माणको क्रममा रहेको प्रमुख बजार जनक चोक-भानु चोक, जानकी मन्दिर–जनक चोक, जानकी मन्दिर–महावीर चोकसहितको सडक खण्ड हिलाम्य भएपछि हिँडडुल गर्न समेत सर्वसाधारणलाई सास्ती भएको छ । वर्षा आउने थाहा हुँदा हुँदै पनि मुख्य सडकहरु निर्माणका लागि भन्दै खनिएपछि अहिले ठूलो समस्या भएको छ ।
वर्षाका कारण उपमहानगरपालिकाको वडा नम्बर १, २, ४, १०,१३, लगायतका स्थानमा सडकहरु जलमग्न भएका छन् । यता, वर्षाबाट आउने बाढीको कारण धनुषाको धनुषाका एक दर्जन भन्दा बढी गाउँ डुबानको जोखिममा रहेको छ । वर्षाका कारण पूर्वी धनुषाका अधिकांश गाउँ बाढीको जोखिममा परेको हो ।
लगातारको वर्षाले धनुषाको सखुवा मडान, सुन्दरपुर, दुब्बरकोट हथलेटवा, सिंग्याही मडान, पतनुखा, बलहा सघारा, कठाल लगायतका गाउँहरु बाढीको जोखिममा परेको छ । कमला छेउमा रहेका यी गाउँहरु हरेक वर्ष बर्खा मौसममा बाढी र डुबानका कारण प्रभावित हुँदै आएको छ ।
निरन्तर भइरहेको वर्षाले ती गाउँहरु जलमग्न भइसकेको छ भने सदरमुकाम जनकपुरसँग यातायातको साधन समेत सम्पर्क विहीन अवस्थामा छ । जीर्ण रहेका त्यस भेगका सडकहरुमा वर्षाका कारण यातायातका साधन गुड्न नसकेपछि सदरमुकामबाट सम्पर्क विहीन हुने अवस्था उत्पन्न भएको स्थानीयहरु बताउँछन् ।
पूर्वी धनुषाका स्थानीयहरु हरेक वर्ष बर्खामा बाढीको समस्या झेल्दै आएपनि सरोकारबला निकायले बाढीबाट जोगिन पूर्व तयारीतर्फ ध्यान दिन सकेका छैनन् ।
प्रतिक्रिया दिनुहोस !
