'देशलाई भ्रष्टाचारको महारोगले गाँज्यो, उपचार खोजौँ'
बर्दिबास: देशलाई भ्रष्टाचारको महारोगले गाँजेकाले विकासमा पछाडि परेको नेपाल कम्युनिष्ट पार्टीका प्रवक्ता नारायणकाजी श्रेष्ठ ‘प्रकाश’ ले बताएका छन् । बर्दिबास नगरपालिकाको दोस्रो नगरसभाबाट पारित आर्थिक वर्ष २०७५/०७६ को नीति, कार्यक्रम तथा बजेट सार्वजनिक गर्दै नेता प्रकाशले यस्तो बताएका हुन् ।
राजनितिक र समाजिक शक्तिहरुसँग सरकार विकास र समृद्धिका लागि हातोमालो गर्न सबै बाधा विरोध छिचोल्न तयार रहेको उनले जिकिर गरे । ‘समृद्ध नेपाल बनाउन भ्रष्टाचार जस्तो महारोगलाई उपचार गर्नु पर्छ,’ नेता श्रेष्ठले भने, ‘भ्रष्टाचार महारोग फलामे ढोका जस्तै छ । भ्रष्ट्राचार नियन्त्रण नभए देशको समृद्धिको यात्राबीचमै तुहिन्छ ।’ समृद्धिको नारा व्यवहारमा लागू गर्न सरकारले सक्नुपर्नेमा उनले जोड दिए ।
दलाद, पुँजीवादी र बाह्य शक्तिले देशमा अझै पनि अस्थितरता ल्याउन खोजेको उल्लेख गर्दै उनले थपें,‘नेपाली जनताले हामीलाई दिएको विश्वासलाई घात हुन्न दिन्नौं ।’अहंकार, खुट्टा तान्ने प्रवृत्ति, अस्वस्थ्य होडबाडीले देश विकास नहुने उनले औंल्याए ।
‘विकास र यात्रामा खुट्टा तान्ने चलने समृद्धि र विकासको यात्रा पुरा हुँदैन,’ नेपाली कांग्रेसलाई इंगित गर्दै, उनले भने, ‘चुनाव जित्नेका लागि सरकारले गर्ने विकास मात्रै होइन, । विपक्षीको लागि पनि सरकारले विकासको काम गर्छ । त्यसो भए सरकारको कदममा बाधा र विरोध किन ?’
राम्रो काममा विपक्षीले समर्थन गर्नुपर्ने बताउँदै उनले आर्थिक समृद्धि र समाजिक न्याय सबैको पहुँचमा पुर्याएर राजनीतिक रुपान्तरणको औचित्य पुष्टि गर्नु आजको आवश्यकता रहेको औंल्याए ।