रामचन्द्र पौडेल भन्छन् : रातोझण्डा ओढ्नेलाई जे गरे पनि छुट छ
दमौली: नेपाली कांग्रेसका वरिष्ठ नेता रामचन्द्र पौडेलले दीपकराज जोशी प्रधानन्यायाधिश प्रकरणमा कारबाही गर्नुपर्ने भए न्याय परिषदका अध्यक्षलाई कारबाही गर्न सरकारलाई चुनौती दिएका छन् ।
नेपाली कांग्रेस तनहुँले दमौलीमा गरेको विरोध सभामा बोल्दै उनले प्रधानमन्त्री आफै अध्यक्ष भएको परिषदले जोशीको नाम सिफारिस गरेको भन्दै अहिले आएर प्रमाणपत्रको विवाद झिकिएको बताए ।
उनले न्यायपालिकामा हस्तक्षेप गर्ने नियतबाट अहिले संसदीय सुनुवाई समितिमार्फत विवाद झिक्नुमा षडयन्त्र लुकेको बताए ।
‘संवैधानिक परिषदबाट निर्णय हुँदासम्म विरोध आएन,’ उनले भने, ‘अहिले आएर कुरा उठाउनु प्रपञ्च हो ।’ उनले यदि जोशी प्रकरणमा कारबाही हुनुपर्ने भए प्रधानमन्त्री ओलीलाई नै कारबाही हुनुपर्ने बताए ।
रातो झण्डा ओढेपछि जे गरे पनि छुट
वरिष्ठ नेता पौडेलले अहिले देशमा अधिनायकवाद आएको महसुस भएको बताए । जेल धाउनुपर्ने ज्यानमारादेखि बलात्कार अभियुक्त, भ्रष्टाचारी आदि अपराध गरेकाले पनि सरकारनिकट भएकै कारण उन्मुक्ति पाएकोप्रति उनले कटाक्ष गरे ।
तत्कालिन नेकपा माओवादीले लुटेको जग्गालाई समेत बैधता दिन लागिएको भन्दै उनले विरोध गरे । ‘अपराधीहरु जेलमा हुनुपर्ने हो,’ उनले भने, ‘तर रातो झण्डा ओढ्नेलाई जे गरे पनि छुट छ ।’
तनहुँ सदरमुकाम दमौलीको राजनीतिक थलो अनशन चौतारीमा गरिएको कार्यक्रममा केन्द्रीय सदस्य शंकर भण्डारी र नेता ध्रुव वाग्लेलगायतले बोलेका थिए । गएको प्रदेश तथा संघीय चुनावमा सबै सिट हारेको कांग्रेसले मंगलबार भने आफ्नो शक्ति कमजोर नरहेको छनक दिन शक्ति प्रदर्शन गरेको थियो ।