कालिकोट : कालिकोट जिल्लाको महावै गाउँपालिका-३ नकुमा पहिरो जाँदा स्थानीयका ३४ परिवार बिचल्लीमा परेका छन् ।एक सातादेखि आएको अविरल वर्षासँग नकुमा गएको पहिरोका कारण स्थानीय ३४ परिवारको बिचल्ली भएको हो ।
महावै गाउँपालिका-३ का वडासदस्य रजबहादुर विष्टले गाउँको तलतिरबाट निरन्ततर पहिरो खस्दा पूरै गाउँ जोखिममा परेको बताए । उनले नकुको गाउँमा ३३ विष्ट र एक सिंकको परिवारको पहिरोका कारण बिचल्ली भएको छ । उनले भने, ‘गाउँको तलतिरको भाग पूरै भासिएको छ । स्थानीय बखतबहादुर सिंहको घर र प्रवीण विष्टको खुर्सानी बारीसम्म पहिरो पुगेकाले गाउँका सबैले अन्यत्र जानुपर्ने अवस्था आएको छ । उनले गाउँमा पहिरोले सबैको बिचल्ली हुने अवस्था आएपछि शुक्रबार जिल्ला प्रशासन कार्यालय र जिल्ला प्रहरी कार्यालयमा निवेदन दिएर पहिरो पीडितलाई सुरक्षित स्थानमा सारी पहिरो रोकथामका लागि पहल गरिदिन आग्रह गरेको बताए ।
यस्तै, स्थानीय भीमराज विष्टले साउन १ गतेदेखि गाउँको तल्लो भागबाट पहिरो सुरु भएको र हाल उक्त पहिरो निरन्तर बग्दै गाउँसम्म आएकाले निकै जोखिम बढेको बताए । उनले गाउँका ११ घरपरिवारको धान रोपेको खेतसहित पाँच बिघा जमिन सबै बालीसहित बगेको जानकारी दिए । उनले भने, ‘न वर्षा रोकिएको छ न पहिरो ।’ शुक्रबारसम्म गाउँमै बसेका स्थानीयले अब त गाउँ नै छाड्नुपरेको छ । उनले गाउँ छाडेर वनमा रूखको छहारीमा पाल हालेर बस्नुपर्ने अवस्था आएको बताए । उनका अनुसार अझै पानी परिरहे पूरै गाउँ पहिरोले बग्ने सम्भावना छ ।
स्थानीय सर्जन विष्ट, रत्न विष्ट, तीर्थ विष्ट र हिक्मत विष्टले गाउँ पूरै पहिरोले जोखिममा परेकाले जिल्ला प्रशासनमा हारगुहार गर्न सदरमुकाम आएको बताए । उनीहरूले भने, ‘गाउँमा टेलिफोन सेवासमेत छैन । डाँडामा गएर फोन गर्नुपर्छ । फोन गर्नकै लागि २ घण्टा हिँड्नुपर्छ । पहिरोले सबै खेत बगाएर गाउँको छेउका घर नै भासिएपछि सबैले गाउँ छाड्न थालेको बताएका छन् । महावै गाउँपालिकाका अध्यक्ष नन्दबहादुर सिंहले पहिरोले गाउँ नै जोखिममा परेकाले जिल्ला दैवीप्रकोप उद्धार समितिमा जानकारी गरी स्थानीय नागरिकलाई सुरक्षित स्थानमा जान आग्र गरिएको बताए । उनले वर्षासँगै निरन्तर पहिरो खसिरहेकाले तत्काल स्थानीयलाई गाउँबाट सुरक्षित स्थानमा सार्नुको विकल्प नरहेको बताए ।
जिल्ला प्रशासन कार्यालयका सूचना अधिकारी तथा सहायक प्रमुख जिल्ला अधिकारी राजकुमार दुलालले नकुको पहिरोको सूचना आफूहरूले पाउनासाथ गृह मन्त्रालयमा समेत पत्र पठाएको र स्थानीय सबै नागरिकलाई सुरक्षित स्थानमा राख्न गाउँपालिकासँग समन्वय गरिरहेको बताए । उनले जिल्लाभरि नै निरन्तर वर्षाका कारण पहिरो जाने र घर भत्किएको निवेदन आउने गरेको बताए । उनका अनुसार पछिल्लो समय वर्षाका कारण घर भत्किएका मात्र ५० वटा निवेदन परेको छ । उनले भने, ‘जिल्ला दैवीप्रकोप उद्धार समितिमा घर भत्कियो भनेर धेरै निवेदन आएका छन् । तर, सबैलाई प्रक्रियागत रूपमा एक लाख क्षति भएकालाई दुई हजार रुपैयाँका दरले राहत वितरण भइरहेको छ ।’
प्रतिक्रिया दिनुहोस !
