ज्यान मुद्दा लगाइएका प्रकाण्डलाई दाङबाट सर्वोच्च लगिँदै
भदौ २६, २०७५ मंगलबार २१:१६:०
तुलसीपुर : भोजपुरबाट दाङ ल्याइएका नेत्रविक्रम चन्द विप्लव नेतृत्वको नेपाल कम्युनिष्ट पार्टीका प्रवक्ता खड्गबहादुर विश्वकर्मा ‘प्रकाण्ड’ लाई दाङबाट काठमाडौँ लग्ने तयारी गरिएको छ ।
बन्दीप्रत्यक्षकरणसम्बन्धी रिट परेपछि प्रकाण्डलाई काठमाडौँ झिकाएर हाजिर गराउन सर्वोच्चले पत्र काटेको थियो । त्यसपछि उनलाई काठमाडौँ लाने तयारी गरिएको इलाका प्रहरी कार्यालय तुलसीपुरमा प्रमुख प्रकाश सापकोटाले जानकारी दिए ।
सर्वोच्चको चिठ्ठी जिल्ला प्रहरी कार्यालयमा आएपछि प्रकाण्डलाई बुधवार काठमाडौँ लगिन लागिएको उनले बताए । निर्वाचनको बेला दाङमा भएको बम विस्फोटमा एक म्यादी प्रहरीको मुत्यु भएको मुद्दा लगाएर उनलाई गत शुक्रवार दाङ ल्याइएको थियो ।
जिल्ला प्रहरी कार्यालय दाङले जिल्ला अदालतबाट सात दिनको म्याद गरेर अनुसन्धान गरिरहेका बेला प्रकाण्डलाई काठमाडौँ झिकाउन आदेश भएको हो । डीएसपी सापकोटाले सर्वाेच्चको निर्णयानुसार दाङको मुद्दा अघि बढ्ने बताए । ‘दाङबाट काठमाडौँ लग्ने तयारी भएको छ,’ सापकोटाले भने, ‘सकभर बुधवार नै काठमाडौँ लगिन्छ ।’
दाङ प्रहरी प्रमुख कृष्णहरि शर्माले सर्वाेच्च अदालतले गैरकानुनीरुपमा थुनिएको के कसो हो ? मान्छेसहित उपस्थिति हुनु भनेकाले सर्वोच्चमा उपस्थित गराउन लिन लागिएको बताए । सात दिनको म्याद थपेर अनुसन्धान अघि बढाएको दाङ प्रहरीले त्यो म्याद नगुज्रिँदै सर्वाेच्चले उपस्थित गर्न निर्देशन दिएपछि उनलाई काठमाडौँ फिर्ता गर्न लागिएको छ ।
प्रतिनिधि र प्रदेशसभा निर्वाचनका क्रममा तुलसीपुरमा बम विष्फोट गराएको अभियोगमा प्रकाण्डलाई प्रहरीले नियन्त्रणमा लिएको थियो । नेपाली कांग्रेसका सभापति शेरबहादुर देउवाको चुनावी सभालाई सम्बोधन गर्न दाङ आउँदा तुलसीपुर बजारमा बम बिष्फोट हुँदा एकजना म्यादी प्रहरीको मृत्यु भएको थियो ।
उक्त घटनामा विप्लव नेतृत्व नेकपाको संलग्नता रहेको भन्दै प्रहरीले प्रकाण्डालाई नियन्त्रणमा लिएर अनुसन्धान गरिरहेको छ । प्रकाण्डले भने आफूलाई राजनीतिक पूर्वाग्रहका आधारमा फसाउन खोजिएको आरोप लगाए । विश्वकर्माले यसको मूल्य चुकाएर छाड्ने पनि सरकारलाई चेतावनी दिँदै आएका छन ।
‘मलाई हतकडी लाग्दा हिजो जनयुद्धका मेरा सहकर्मीहरु प्रतिक्रियावादी भएका छन’, विश्वकर्माले भने, क्रान्तिपछि कोही प्रतिक्रियावादीहरु हुन्छन । कोही प्रतिक्रान्तिकारी हुन्छन र राष्ट्रघाती पनि हुन्छन यो स्वभाविक हो ।’ विश्वकर्माले गृहमन्त्री र प्रधानमन्त्रीलाई यसको मूल्य तिर्न नसक्ने गरि चुकाएर छाड्ने चेतावनी दिएका छन ।
प्रतिक्रिया दिनुहोस !
