काठमाडौं : मानव तस्करहरुले नेपालमा राम्रो काम र आकर्षक तलब पाउने प्रलोभन देखाएर बंगलादेशीहरूलाई काठमाडौं ल्याउने गरेको खुलासा भएको छ । यसरी बंगलादेशीलाई काठमाडौं ल्याउने गिरोह दुवै देशमा सक्रिय रहेको पनि खुलेको छ ।
प्रहरीले पक्राउ पर्नेहरूमाथि कुनै अनुसन्धान नगरी अध्यागमन विभागमा बुझाउने गरेको छ । अध्यागमनले सामान्य सोधपुछ र बयान मात्र लिएर डिपोर्ट गर्ने गरेको छ । तर त्यस्ता मानव तस्कर गिरोह पक्राउ गर्न नसक्दा दुवै देशका सुरक्षा निकाय र अध्यागमनकै संलग्नतामा मानव तस्करी भइरहेको आशंका उब्जिएको छ । मानव तस्करले जनही २–३ लाख नेपाली रुपैयाँ असुलेर बंगलादेशीहरूलाई काठमाडौं ल्याउने गरेका छन् । तस्करहरूले बंगलादेशीहरूको राहदानीलगायत अन्य कागजपत्र खोसेर लिने गरेका छन् ।
तस्करहरूले संगठित रूपमा भारतको कोलकाता हुँदै बंगलादेशीहरूलाई काठमाडौं ल्याउने गरेका छन् । उनीहरूसँग न राहदानी छ न नेपालको भिसा नै । राहदानी र भिसा नभएका उनीहरूका गतिविधि राष्ट्रिय सुरक्षामा कति संवेदनशील हुन सक्छ न सरकार न त सुरक्षा निकायले नै चासो दिएका छन् । प्रहरी र अध्यागमन दुवैले बंगलादेशीलगायत अवैध आप्रवासीका गतिविधि र उनीहरूको सम्पर्कसम्बन्धमा कुनै अनुसन्धान गरेका छैनन् । विदेशी नागरिक अनुगमन निर्देशिका लागू भए पनि गृह मन्त्रालयले उनीहरूका गतिविधि अनुगमन गरेको छैन ।
भने जस्तो काम नपाएपछि ठूलो संख्यामा बंगलादेशीहरू न्युरोड, ठमेल, गौशालालगायत क्षेत्रमा मजदुरी गर्दै आएका छन् । केही बंगलादेशी मजदुरीका लागि काठमाडौं उपत्यकाबाहिर समेत गएका छन् । कतिपयले नेपाली महिला विवाह गरेका छन् । अधिकांश बंगलादेशी नेपाली बोल्न सिकेका छन् । उनीहरूको वर्णसमेत नेपालीसँग मिल्दोजुल्दो भएकाले नेपालमा बस्न सहज भएको छ ।
त्यसमाथि नेपाली बोल्न सिकेपछि उनीहरूले तराईका जिल्लामा नक्कली बाबु खडा गरी नेपाली नागरिकता र राहदानी लिने गरेका छन् । त्यसपछि नेपाली राहदानीमा उनीहरूको गन्तव्य खाडी देशहरू हुने गरेको प्रहरीले जानकारी दिएको छ । मानव तस्करले नेपाली नजान्ने बंगलादेशीलाई समेत मोटो रकम असुलेर सेटिङ गरी नेपाली नागरिकता र राहदानी बनाइदिने गरेका छन् ।
प्रहरीले दुई वर्षअघि अवैध तरिकाले नेपालमा बसिरहेका झण्डै तीन दर्जन बंगलादेशी पक्रेको थियो । ती सबैलाई अध्यागमनले डिपोर्ट गरेको थियो । मानव तस्करहरूले नेपाल–भारत खुला सीमाको फाइदा उठाउँदै सीमा सुरक्षामा तैनाथ सुरक्षाकर्मीलाई प्रभावमा पारी उनीहरूलाई नेपाल ल्याएका थिए ।
सीमा सुरक्षामा तैनाथ सशस्त्र प्रहरी बलले समेत बंगलादेशीहरूको अवैध रूपमा नेपाल आउने क्रम रोक्न सकेको छैन ।
अवैध तरिकाले नेपाल छिरेका १० जना बंगलादेशी अहिले अध्यागमनको हिरासतमा छन् । उनीहरूबंगलादेशीमाथि अनुसन्धान थालेको छ । विभागले तीबाहेक एक जनालाई ‘ओभर स्टे’ बापतको रकम तिर्न नसकेपछि जेल पठाउने तयारी गरेको छ । उनीहरूले इस्माइल नुर नामका बंगलादेशीले नै आफूहरूलाई भारत हुँदै काठमाडौं ल्याएको बयान दिएका छन् । तर इस्माइलबारे उनीहरूले अन्य तथ्य केही बताएका छैनन् । बयानका क्रममा उनीहरूले इस्माइल अहिले आफ्नो सम्पर्कमा नरहेको भनेका छन् ।
अध्यागमन विभागको मुद्दा शाखाका अधिकृत चिरन्जीवी थापाले हिरासतमा रहेका बंगलादेशीमाथि अनुसन्धान भइरहेको जानकारी दिए । उनले भने, ‘उनीहरूले बंगलादेशी दलालले काठमाडौं ल्याएको बताए पनि ती व्यक्ति अहिले सम्पर्कमा नभएको बयान दिएका छन् ।’ उनीहरूसँग राहदानी नभएकाले विभागले काठमाडौंस्थित बंगलादेशी दूतावाससँग ट्राभल डकुमेन्टका लागि आग्रह गरेको छ । दूतावासले ट्राभल डकुमेन्ट दिएपछि विभागले उनीहरूलाई निष्कासन गर्ने छ । उपत्यकामा झण्डै ४ हजार बंगलादेशी अवैध बसोबास गरी काम गरिरहेका छन् ।
प्रतिक्रिया दिनुहोस !
