एजेन्सी : म्यासेडोनियाका मतदाताले आफ्नो मुलुकको नाम परिवर्तन गर्ने पक्षमा मतदान गरेका छन् । यूरोपेली यूनियन र नेटोमा प्रवेश पाउन यहाँ देशकै नाम परिवर्तन गर्नुपरेको हो ।जनताले आइतबारको जनमतसंग्रहमा न्यून मतदान भए पनि बहुसंख्यक मतदाताले अलग्गै नाम राख्ने प्रस्तावमाथि मतदान गरेका थिए । यो मतदानसँगै म्यासेडोनियालाई नेटो र यूरोपेली यूनियनको सदस्यता प्राप्त गर्ने बाटो खुलेको छ ।
निर्वाचन आयोगका अनुसार मुलुकका ९३ प्रतिशत मतदानस्थलको मतगणना गर्दा ९१.३ प्रतिशतले म्यासेडोनियाको नाम उत्तरी म्यासेडोनिया राख्न सहमति जनाएका छन् । नाम परिवर्तन गर्नु हुँदैन भन्ने पक्षमा केवल ५.७ प्रतिशत मत आएको थियो । म्यासेडोनियाका १८ लाख मतदातामध्ये करिब एक तिहाइले मात्र मतदान गरेका थिए ।
मतदानको परिणाम सार्वजनिक भएसँगै ग्रीसको विदेश मन्त्रालयले जारी गरेको विज्ञप्तिमा ग्रीस गत जुन महिनामा म्यासेडोनियासँग भएको सम्झौताप्रति प्रतिबद्ध रहेको बताएको छ । नाम परिवर्तन गरेमा म्यासेडोनियालाई नेटो र ईयूको सदस्यताका लागि सहयोग गर्ने ग्रीसले यसअघि नै प्रतिबद्धता व्यक्त गरिसकेको छ ।
ग्रीसका प्रधानमन्त्री अलेक्सिस सिप्रासले म्यासेडोनियाका समकक्षीलाई टेलिफोन गरी सम्झौताको कार्यान्वयनलाई निष्कर्षमा पु¥याउन म्यासेडोनियाका प्रधानमन्त्रीको साहस र प्रतिबद्धताको प्रशंसा गरे । अब म्यासेडोनियाको नाम परिवर्तनका लागि संसद्को दुई तिहाइ मत आवश्यक पर्नेछ । यसलाई ग्रीसको संसद्ले समेत अनुमोदन गर्नुपर्नेछ ।
देशको नाम परिवर्तन गर्ने पक्षमा जनमतसंग्रह भएलगत्तै नेटोका प्रमुख जेन्स स्टाल्टेनबर्गले खुशी व्यक्त गरेका छन् । यसबाट ग्रीससँगको दशकौं विवाद अन्त्य भएको उनको भनाइ छ । उनले ट्विट गरे, ‘म सबै राजनीतिक दल र यसका नेतासँग यस्तो ऐतिहासिक अवसरको लाभ लिन अनुरोध गर्दछु ।
यसलाई रचनात्मक र जिम्मेवारीपूर्ण तरिकाले उपयोग गर्नुपर्छ ।’ उनले अब म्यासेडोनियालाई नेटोमा प्रवेश दिइने स्पष्ट पारे । प्रक्रिया पूरा गर्नासाथ म्यासेडोनियामा नेटो सैनिक खटाइने जानकारी दिए । सबैभन्दा नयाँ सदस्यका रूपमा नेटो सदस्यमा स्वागत गर्न आफू इच्छुक रहेको उनको कथन छ । ग्रीसको एउटा प्रान्तसँग नाम जुधेकै कारण म्यासेडोनियालाई नेटो र ईयूमा नल्याउन ग्रीसले दबाब दिँदै आएको थियो ।
प्रतिक्रिया दिनुहोस !
