सिन्धुली : सिन्धुलीको कमलामाई नगरपालिकाभित्र सुत्केरी गाई भैँसीको लागि सुत्केरी भत्ता दिन थालेको छ ।
नगरका किसानहरुलाई पशुपालन व्यवसायप्रति आकर्षित गर्ने उद्देश्यले सुत्केरी पशुका लागि भत्ता दिन सुरु गरीएको कमलामाई नगरपालिकाले जनाएको हो । नगर क्षेत्रभित्रका किसानले पालेका गाई र भैँसी सुत्केरी हुँदा भत्ता स्वरुप एक हजार रुपैयाँ भत्ता दिन थालिएको नगरपालिकाका पशु चिकित्सक हरिहर लामिछानेले जानकारी दिए ।
यो रकम सुत्केरी पशुलाई त्यस अवधिमा खाद्यान्नको लागि भएको बताइएको छ । नगरपालिकाले भत्ताको लागि किसानहरुबाट गत मंसिर १ गतेदेखि नै निवेदन सङ्कलन सुरु गरेको पनि बताइएको छ ।
अहिलेसम्म वडा कार्यालयको सिफारिसका आधारमा नगरभित्रका २८ जना किसानले मात्रै भत्ताको दावी गर्दै निवेदन दर्ता गराएका छन् । नगरपालिकाका अनुसार सुत्करी भत्ता लिन किसानले वडा कार्यालयको सिफारिसमा पशुधनी र ब्याएको गाई–भैँसीको बच्चासहित देखिने फोटो र नागरिकताको प्रतिलिपिसहितको निवेदन नगरपालिकामा दर्ता गर्नुपर्ने हुन्छ ।
यसरी उपलब्ध गराएको भत्ताबाट सम्बन्धित किसानले ब्याएको पशुलाई पौष्टिक आहार र खाद्यान्न बाहेक अन्य कामको लागि खर्च गर्न पाउँदैनन् । जिल्लाको कमलामाई नगरपालिका पशु पालनका लागि उपयुक्त क्षेत्र मानिन्छ । यहाँको भद्रकाली, जलकन्या, डाँडीगुराँसे, रानीचुरी, रानीवास लगायत वडालाई व्यावसायिक पशुपालनको लागि पकेटक्षेत्र बनाउने तयारी सरोकारवालाहरुको छ ।
प्रतिक्रिया दिनुहोस !
