रुस्लान सिमरा गोल्डकप ः आयोजकको बिजयी सुरुवात
सिमरा ः मकवानपुर ११ माथी सहज जीत हात पार्दै आयोजक नव जनजागृति युवा क्लबले रुस्लान दशौं सिमरा गोल्डकपमा बिजयी सुरुवात गरेको छ ।
सिमरा रंगशालामा बिहिवार भएको उद्घाटन खेलमा आयोजकले मकवानपुरलाई ३–० ले पराजित गरेको हो । आयोजकको जीतमा निरज थापामगरले दुई र प्रज्वल थापामगरले एक गोल गरे ।
युवा खेलाडीले भरिएको आयोजक खेलको सुरुवातदेखीनै मकवानपुरमाथी हाबी देखिएको थियो । आफैले सञ्चालन गरेको सिमरा एकेडेमीका खेलाडीलाई उतारेको जनजागृतिले तीनै गोल दोस्रो हाफमा गरेको थियो ।
निर्धारित ८० मिनेटको खेलको पहिलो हाफमा पाएको थुप्रै अवसर सदुपयोग गर्न नसक्दा आयोजकले गोलको खाता खोल्न दोस्रो हाफसम्म पर्खनुप¥यो । खेलको ४६औं मिनेटमा आयोजकका निरज थापामगरले उत्कृष्ट गोल गर्दै टिमलाई अग्रता दिलाएका थिए । सुरज ठकुरीले प्रहार गरेको फ्रिकिक बल क्रस बारमा लागेर रिबाउण्ड भएपछि निरजले त्यसलाई सदुपयोग गर्दै जाली चुमाएका थिए ।
पहिलो हाफमा तालमेल मिलाउने प्रयास गरेको मकवानपुरले दोस्रो हाफमा लय गुमाउन पुग्यो । मकवानपुरले दोस्रो हाफमा आयोजकलाई नियन्त्रणमा राख्न सकेन् । आक्रामक खेल खेल्दै आयोजकले खेलको ६० औं मिनेटमा अग्रता दोब्बर पारेको थियो । मकवानपुरको रक्षापंक्ती सम्हालिन नसक्दा आयोजकका प्रज्वल थापामगरले डिबक्स भित्र पाएको बललाई सदुपयोग गर्दै खेल २–० को स्थितीमा पुर्याएका थिए ।
गोलअन्तर दोब्बर पारेपछि आयोजक खेलको अन्तिम समयमा झन आक्रामक बन्यो । आयोजकले खेलको ७१ औं मिनेटमा तेस्रो गोल गर्दै गोलअन्तर फराकिलो पार्यो । मोहित गुरुङको कर्नर बलमा निरज थापामगरले व्यक्तिगत दोश्रो गोल गर्दै खेल ३–१ को स्थितीमा पु¥याए । निरज खेलको म्यान अफ दि म्याच घोषित भए । उनले १० हजार प्राप्त गरे ।
दोस्रो हाफको अन्तिम समयमा मकवानपुरका राजेश परियाले डिबक्स भित्र पाएको उत्कृष्ट अवसर चुकाउन पुग्दा टिमले ३–० हार ब्यहोर्यो । मकवानपुरका प्रशिक्षक विजयलाल श्रेष्ठले टिममा तालमेलको अभाव देखिएको प्रतिक्रिया दिए । पहिलो हाफको बराबरीपछि दोस्रो हाफमा आक्रामक खेल्ने रणनिति असफल भएको उनको भनाई थियो ।
टिमको जीतबाट खुशी देखिएका आयोजकका प्रशिक्षक सोनु क्षेत्रीले आफ्नो खेलाडीले उत्कृष्ट खेल प्रदर्शन गरेको बताए । पहिलो हाफमा पाएको केही अवसर गुमाउन पुग्दा गोलका लागि दोस्रो हाफसम्म संघर्ष गर्नुपरेको क्षेत्रीको भनाई थियो ।
यसअघि प्रतियोगिताको उद्घाटन यूवा तथा खेलकुद मन्त्री जगतबहादुर विश्वकर्माले गरेका थिए । माघ १२ गतेसम्म सञ्चालन हुने प्रतियोगिताको विजेताले ६ लाख र उपविजेताले तीन लाख नगद प्राप्त गर्नेछन् । प्रतियोगितामा ए डिभिजनका सात र मोफसलका तीन गरी १० टिम सहभागी छन् । प्रतियोगिता अन्तर्गत शुक्रवार बिभागिय टिम नेपाल एपिएफ क्लब र बिशाल मेमोरियल फाउण्डेशन वीरगञ्जबीच खेल हुनेछ ।
प्रतिक्रिया दिनुहोस !
