काठमाडौं : नेपालस्थित रसियाली दूतावासको आग्रहमा सरकारले अवैध रूपमा नेपाल बस्दै आएका चार रसियाली नागरिकको प्रवेशाज्ञा र विलम्ब शुल्क मिनाहा गरेको छ । अवैध रूपमा बसेका उनीहरूले भिसा र विलम्ब शुल्कबापतको रकम तिर्न नसक्ने जनाउँदै रसियाली दूतावासले मिनाहा गर्न कूटनीतिक लबिङ गरेको थियो ।
सन् २०१६ मा भारतबाट स्थलमार्ग हुँदै नेपाल छिरेका एकै परिवारका तीन र नेपालमा जन्मिएका अर्का एक गरी चार जना रसियाली नागरिकको भिसा र विलम्ब शुल्क मिनाहा गरेको हो । नेपालस्थित संयुक्त राष्ट्रसंघीय शरणार्थी उच्च आयुक्तको कार्यालय (यूएनएचसीआर)ले यसअघि नै ४७ पाकिस्तानी, १९ सोमालियाली, ५ बंगलादेशी र १ जना म्यान्मारी गरी ७२ जना अवैध आप्रवासीको भिसा, विलम्ब शुल्क र जरिवाना मिनाहा गर्न गृह मन्त्रालयमा प्रस्ताव पठाइसकेको छ ।
पोखरामा मजदुरी गर्दै बसेका चार रसियालीसँग सामान्य गुजारा गर्नेसमेत पैसा नभएपछि सरकारले भिसा शुल्क मिनाहा गरेको हो । रसियाली नागरिक दिमित्री खामोभ, उनकी पत्नी भेलरिया र उनीहरूका छोरा बोग्दान सन् २०१६ अप्रिल १२ मा नेपाल छिरेका थिए । अर्का छोरा भने नेपालमा जन्मिएका हुन् । नेपालस्थित रसियाली दूतावासले उनीहरूको भिसा शुल्क मिनाहा गर्न भन्दै परराष्ट्र र गृह मन्त्रालयमा पत्राचार गरेको थियो । विदेशीहरूको अनुगमन नगर्दा कहाँ, कति विदेशी के गर्दै बसेका छन् भन्ने तथ्यांक स्वयं सरकारसँग पनि छैन ।
विदेशीहरूको अनुगमन गर्न सरकारी संयन्त्र उदासीन बन्दा अवैध रूपले नेपाल बस्दै आएका विदेशीको संख्या बढदो छ । गृह मन्त्रालयले विदेशी नागरिक अनुगमन निर्देशिका बनाएको त छ । तर कार्यान्वयन भएको छैन ।
रसियाली दूतावासले उनीहरूको भिसाशुल्क मिनाहा गर्न सरकारलाई अनुरोध गरेको अध्यागमन विभागका निर्देशक विष्णुहरि उपाध्यायले बताए । ‘शुल्क मिनाहा गर्न सरकारलाई पत्राचार गरेपछि हामीले सिफारिस गरेका हौं’, उनले भने । रसिया, उज्वेकिस्तान, केन्यालगायत अफ्रिकी मुलुकका नागरिक अवैध रूपमा नेपाल बस्दै आएका थिए ।
सन २०१६ को अप्रिलमा बेलहिया नाकाबाट ९० दिनको भिसा लिएर रसियाली एक दम्पति र उनका एक छोरा नेपाल प्रवेश गरेका थिए । नेपाल बसाइका क्रममा उनीहरूबाट अर्का एक छोरा जन्मिएका थिए ।
मन्त्रिपरिषले ओभर स्टेबापतको झन्डै नौ लाख र विलम्ब शुल्क मिनाहा गरेको हो । यससँगै नेपालस्थित रसियाली दूतावासले चारै जनाको ट्राभल डकुमेन्ट बनाइदिएको छ । उनीहरू लामो समयदेखि पोखरामा लुकिछिपी बस्दै आएका थिए ।
प्रतिक्रिया दिनुहोस !
