राजस्व छलीमा भन्सार अधिकृतसहित ८ जनाविरुद्ध मुद्दा, साढे ७ करोडको बिगो दाबी

काठमाडौं : रसुवा भन्सार कार्यालय टिमुरेका भन्सार अधिकृत पवित्रकुमार खड्काविरुद्ध साढे ७ करोड बिगोसहित मुद्दा दायर गरिएको छ । अख्तियार दुरूपयोग अनुसन्धान आयोगले खड्कासहित ८ जनाविरुद्ध विशेष अदालत काठमाडौंमा मुद्दा दायर गरेको हो । उनीहरुविरुद्ध ७ करोड ५९ लाख ६३ हजार बिगो मागदाबी गरिएको छ ।

भन्सारका नासु धीरजकुमार थापा, मितेरी इन्टरनेसनलका मालिक सुमन श्रेष्ठ, मितेरीका रन्जन त्रिपाठीलाई प्रतिवादी बनाइएको छ । लामटाङ ट्रेड कन्सर्नका गाडीधनी धनबहादुर तामाङ, नेपाल बंगलादेश बैंकमा गाडी नामसारी गर्न पत्राचार गर्ने आकाश श्रेष्ठ, गाडी जिम्मा लिने निरन्जन त्रिपाठी र चालक डम्बरबहादुर श्रेष्ठविरुद्ध मुद्दा दायर गरिएको छ । अधिकृत खड्का र नासु थापालाई ८–१० वर्ष कैद सजायको माग गरिएको छ भने अन्यलाई आधा सजाय हुनेछ ।

राजस्व अनुसन्धान विभागको टोलीले भन्सार कार्यालयको प्रज्ञापन अनुमति जाँचपास गरेको आधारमा काठमाडौं ल्याउँदै गरेका चाइल्ड भेस्ट, बेबी इलास्टिक कट्टु, इलास्टिक कट्टु, भेस्टलगयत बरामद गरेको थियो । ती सामान ना ५ ख ६६५४ नम्बरको ट्रकबाट ढुवानी गरिरहेका बेला राजस्वले नियन्त्रणमा लिएको थियो । गत मंसिर २४ गते काठमाडौं जिल्ला अदालतमा अधिकृत खड्कालगायत विरुद्ध मुद्दा दायर गरिएको थियो ।

मुद्दाको अभियोगपत्रसहित प्रतिलिपि कागजात र उजुरीमाथिको अनुसन्धानबाट एडिडास लेखिएका भेस्ट र कट्टु सेट रहेको पाइएको छ । पैठारीकर्ता वा भन्सार एजेन्टले एउटा सामानलाई अर्कै भनेर जुत्ता ल्याएको पाइएको छ । सामानको प्रकृति, भौतिक विशेषता, गुण, नाप, आकार र गुणस्तरमध्ये सबै वा कुनै फरक पारी घोषणा गरे वा कुनै सामान घोषणा नै नगरे भन्सार ऐनबमोजिम सजाय हुने व्यवस्था छ ।

राजस्व ठग्न बदनियत गरेको पाइएको छ । एउटा देशमा उत्पादित सामान अर्को देशको भनी उत्पत्तिको मुलुक फरक पारी थोरै राजस्व तिरेर ल्याइरहँदा राजस्व अनुसन्धानले सामान बरामद गरेको थियो । थाइल्यान्डमा निर्मित क्लासिक फुटवेयर उल्लेख भएको २ हजार १ सय ६० जोडा लेडिज जुत्ताको उत्पत्तिको मुलक भन्सारमा चीन देखाएर ल्याएको पाइएको छ । उत्पत्तिको मुलक फरक पारी गलत घोषणा गरिएकोमा भन्सार कार्यालयबाट जरिवाना गर्नु पर्नेमा नगरेको अख्तियारको आरोपपत्रमा उल्लेख छ ।

आपसमा मिलेमतो गरी प्रज्ञापनपत्रमा गलत घोषणा गरी तिर्नुपर्ने राजस्वभन्दा थोरै बुझाएर सामान आयात गरेकाले उनीहरूविरुद्ध भ्रष्टाचार निवारण बमोजिम मुद्दा दायर गरिएको अख्तियारका सहप्रवक्ता मदन कोइरालाले जानकारी दिए ।

यी हुन् मुद्दामा तानिएका व्यक्ति :

१. पवित्रकुमार खड्का

२. धीरजकुमार थापा

३. सुमन श्रेष्ठ

४. रञ्जन त्रिपाठी

५.धनबहादुर तामाङ

६.आकाश श्रेष्ठ

७. निरन्जन त्रिपाठी

८.डम्बरबहादुर श्रेष्ठ