धनगढी : ई-रिक्सामा सवार भएर धनगढी बजारको सडकमा मदिरा पिउँदै हल्ला गरेको आरोपमा प्रहरीले दुई भारतीय डाक्टरसहित तीनजनालाई पक्राउ गरेको छ ।
धनगढीको मिलनचोक क्षेत्रमा मदिराको बोत्तलसहित हो-हल्ला गर्दै हिँडेका भारतको लखिमपुरका दुईजना डाक्टर र एकजना फर्मासिष्टलाई पक्रेर प्रहरीले सार्वजनिक अपराध अन्तर्गत मुद्दा दर्ता गरेको छ ।
भारतमा आइतवार सार्वजनिक विदा दिने गरिएको छ । सार्वजनिक विदाको दिन पारेर फागुन ५ गते भारतको लखिमपुर जिल्लास्थित बाँकेगञ्ज प्राथमिक स्वास्थ्य केन्द्रका मुख्य चिकित्सक डाक्टर सुशील कुमार, अर्का डाक्टर सामन्त राखम र फर्मासिष्ट धर्मबीरले मदिरासहित उपद्रो मच्चाएका थिए । त्यही क्रममा राति ११ बजे धनगढीको मिलनचोक क्षेत्रबा प्रहरीले पक्राउ गरी सार्वजनिक मुद्दा चलाएको हो ।
उनीहरुसँगै धनगढी उपमहानगरपालिका–२ का ई–रिक्सा चालक हेम खत्री र त्यही ठाउँका सन्तोषबहादुर साउदलाई पनि पक्राउ गरी सार्वजनिक अपराध ऐन अन्तर्गत मुद्दा चलाइएको जिल्ला प्रहरी कार्यालय कैलालीका डिएसपी हरिसिंह ओलीले बताए । उनीहरुले पनि मदिरा पिएको प्रहरीले जनाएको छ ।
भारतमा आइतबार छ्ट्टी हुने भएकाले तीनैजना नेपाल घुम्न आएका थिए । त्यही क्रममा ई–रिक्सामा चढेर मदिराको बोतल नै हातमा बोेकेर हल्ला गरिरहेको अवस्थामा उनीहरु पक्राउ परेको डिएसपी ओलीले बताए । सडकमा मदिराको बोत्तलसहित हल्ला गरेका यी डाक्टरले मिलनचोककै डान्सबारमा पसेर लफडा गरेका थिए ।
दुई चिकित्सक र एक फार्मासिष्टलाई नेपालमा पक्राउ गरि मुद्दा चलाएपछि उनीहरु कार्यरत अस्पतालको सेवा बन्द भएको बताइएको छ । नेपाल प्रहरीले, जिल्ला प्रहरी कार्यालय कैलालीबाट उनीहरुलाई ७ दिनको म्याद थपेको छ । उनीहरुलाई सार्वजनिक अपराध ऐन अनुसार २५ दिनसम्म हिरासतमा राख्न सकिने व्यवस्था छ ।
प्रतिक्रिया दिनुहोस !
