भाजपा नेता जोलीद्वारा नेपालमा भएको हेलिकप्टर दुर्घटना जाँच माग
नयाँ दिल्ली : नेपालका पर्यटन मन्त्री रविन्द्र अधिकारीसहित सातजनाको निधन हुने गरी पाथीभरा नजिकै भएको हेलिकप्टर दुर्घटनाको स्थलगत जाँचमा हेलिकप्टर निर्माता एयरबस कम्पनीले गरेको वेवास्ता प्रति भारतीय जनता पार्टीका नेता विजय जोलीले आक्रोश व्यक्त गरेका छन् ।
‘दुर्घटना लगत्तै कम्पनीले तत्काल स्थलगत जाँच गराउनुपथ्र्यो तर एयरबसले यस्तो गरेन । यसले कम्पनीको गैरजिम्मेबारपनालाई दर्शाएको छ । नेपालका विशिष्ट (भिभिआइपि) व्यक्तिहरुको निधनपछि पनि एयरबसले जाँचको पहल गर्दैन भने आमनागरिकको सुरक्षाको सुनिश्चितता कसरी गर्न सक्छ ?’ दिल्ली स्टडी ग्रुपका अध्यक्षसमेत रहेका जोलीले प्रश्न उठाएका छन् ।
गत फागुन १५ गते पाथीभरामा भएको हेलिकप्टर दुर्घटनामा पर्यटन तथा नागरिक उड्डयन मन्त्री अधिकारीसहित अन्य पर्यटन व्यवसायी आङ छिरिङ शेर्पालगायत सातजनाले ज्यान गुमाएका थिए । ज्ञापन पत्रमा नेता जोलीले निधन भएकाहरुप्रति शोक व्यक्त गरेका छन् ।