काठमाडौं : प्रेरणा कोइराला र अश्लेषा लिसानेविच सातौं सिटिजन्स बैंक खुला टेनिस प्रतियोगिताको महिला एकलको फाइनलमा प्रवेश गरेका छन् । पहिलो सेमिफाइनलमा प्रेरणाले गंगा शर्मालाई ६–१, ६–२ को सोझो सेटमा पराजित गरिन् । अर्को सेमिफाइनलमा अश्लेषाले आइरा रावतलाई ६–३, ६–२ ले हराइन् ।
पुरुष एकलमा प्रदीप खड्का र आइभान हो लिसानेविच उपाधिका लागि भिड्ने भएका छन् । प्रदीपले निक रास्त्रुपलाई ६–७, ६–३, ६–२ तथा आइभनले प्रणव खनाललाई ६–०, ६–३ को सेटमा पाखा लगाए ।
पुरुष ६५ वर्षमाथिको फाइनलमा ज्ञानेन्द्रमान ताम्राकारले गौतमलाल प्रधानलाई ४–१, ४–१ को सेटमा निराश पार्दै पहिलो भए । पुरुष ५५ वर्षमाथिको डबल्समा कृष्णराज घले र सुवर्ण धाक्वाको जोडीले स्वर्ण जिते । फाइनलमा उक्त जोडीले कमल थापा र छ्याम्बा धोन्डुपको जोडीलाई ६–१,६–१ को सोझो सेटमा पन्छाए ।
पुरुष ३५ वर्षमाथि डबल्समा कमलबहादुर भण्डारी र महेश श्रेष्ठको जोडीले राजु श्रेष्ठ र सिमान्त गुरुङको जोडीलाई ६–३, ६–० को सोझो सेटमा फाइनलमा पन्छ्याउँदै पहिलो स्थान हात पारे । सोही उमेरसमूहको एकलमा कमलले अर्को स्वर्ण जिते । फाइनलमा कमलले छेवाङ लामालाई ६–२, ६–२ ले हराए ।
पुरुष ५५ वर्षमाथि एकलमा कृष्णराज घलेले करिममुल्लाह मुस्लिमलाई ६–०, ६–२ तथा कमल थापाले सुशीलराज पाण्डेलाई ६–२, ६–० को सोझो सेटमा पराजित गर्दै फाइनलमा स्थान सुरक्षित गरे । पुरुष ४५ वर्षमाथि डबल्समा गोपी भट्टराई र धरम लामिछानेको जोडीले विमलकुमार गुरुङ र हिमाल शाहको जोडीलाई ६–३, ७–६ तथा सुदर्शन विष्ट र राजु क्षेत्रीको जोडीले चन्द्र शाही र दिनेश तुलाधरको जोडीलाई ६–२, ४–६, १०–४ को सेटमा हराउँदै फाइनलमा पुगे ।
४५ वर्षमाथि राजु श्रेष्ठले मनोज शाहलाई ६–४, ४–६, १०–७ तथा चन्द्र शाहीले राजु राईलाई ६–२, ६–० ले पाखा लगाउँदै फाइनल भेट पक्का गरे ।
मिक्स डबल्सको फाइनल सन्तोष खत्री र गंगा शर्मा तथा दिदीभाइ अश्लेषा र आइभन हो लिसानेविचको जोडीबीच हुनेछ ।
प्रतिक्रिया दिनुहोस !
