‘सुर्तीजन्य पदार्थबाट हरेक घण्टा ४ नेपालीको ज्यान जान्छ, उपचारमा ४७ अर्ब खर्च’

काठमाडौं : नेपालमा करिब ९० लाख अर्थात् ३० प्रतिशत भन्दा धेरै मानिसले धुम्रपान र सुर्तिजन्य पदार्थको सेवन गर्ने तथ्यांक सार्वजनिक भएको छ । राजधानीमा आज आयोजित एक अन्तरक्रियामा यस्तो बताइएको हो ।

रिपोर्टस् क्लबमा आयोजित अन्तरक्रिया कार्यक्रममा स्वास्थ्य तथा जनसंख्या मन्त्रालयका निर्देशक बद्री बहादुर खड्काले यस्तो तथ्यांक पेश गरेका थिए । धुम्रपानका कारण मानिसमा स्वास्थ्यसम्बन्धी क्यान्सर, मुटुरोग, मधुमेह र दिर्घ श्वासप्रश्वास जस्ता समस्या देखिने उनले बताएका थिए ।

खड्काका अनुसार धुवाँको रुपमा नेपालमा १८ प्रतिशतले सुर्ती खाने गरेको र काँचो सुर्ती खानेहरु १७ प्रतिशत छन् । यस्तै, उनले १३ देखि १५ वर्षका युवाले २०.४ प्रतिशत सेवन गर्ने गरेको पनि सुनाए ।

यस्तै डेन्टलका विद्यार्थीले ३३ प्रतिशत र नर्सिङ विद्यार्थी १.२ प्रतिशत तथ्यांक रहेको पनि खड्काले बताए । यस्तै, शिक्षक तथा विद्यालयका २१.५ प्रतिशत कर्मचारीहरुले पनि सुर्तिजन्य पदार्थको सेवन गर्ने गरेको तथ्यांक खड्काले पेश गरे । खड्काले नेपालमा ४७ सय ३२ टन चुरोटका फोहोर बट्टा थुप्रिएर रहेको तथ्यांक पनि देखाएका थिए ।

यसबाहेक सुर्तिजन्य पदार्थ सेवनबाट लाग्ने रोगको उपचारको लागि ४७ अर्ब ३० करोड खर्च भइरहेको खड्काले बताएका छन् । वर्तमान विश्वमा प्रत्येक चार सेकेण्डमा एकजना र वार्षिक ८० लाख मानिसको सुर्तिजन्य सेवनबाट लाग्ने रोगका कारण निधन हुने गरेको र नेपालमा प्रत्येक घण्टा चार जनाको मृत्यु हुने गरेको पनि खड्काले बताए ।

उनका अनुसार नेपालमा वार्षिक २७ हजार १ सय ३७ जनाले सुर्तिजन्य पदार्थ सेवनकै कारण लाग्ने रोगबाट मृत्युवरण गर्नुपरेको छ । सुर्तिजन्य पदार्थ रहित दिवसको अवसरमा खड्काले यस्तो तथ्यांक सार्वजनिक गरेका हुन् ।