चन्दा उठाउन गएका विप्लवका सेक्रेटरीसहित दुई पक्राउ

विराटनगर : मोरङको बेलबारीमा एक व्यवसायीसँग माग गरिएको चन्दा उठाउन जाँदा नेत्रविक्रम चन्द ‘विप्लव’नेत्रृत्वको नेकपाका दुई जना हतियारसहित पक्राउ परेका छन् । 

पक्राउ पर्नेमा सुन्दरहरैंचा नगरपालिका–१२ का ४३ वर्षीय अशोक राई र कानेपोखरी गाउँपालिका–६ का ३४ वर्षीय कन्सा माझी धिमाल रहेका छन् । प्रहरीका अनुसार पक्राउ परेका मध्ये राई सरकारद्वारा प्रतिबन्धित ‘विप्लव’ समूहका जिल्ला सेक्रेटरी र धिमाल कार्यकर्ता हुन् । धिमाल साना हतियारबाट गोली हान्न सिपालु कार्यकर्ता भएकाले उनलाई ‘विप्लव’ समूहले ‘सुटर’का रुपमा प्रयोग गर्ने गरेको प्रहरीको प्रारम्भिक अनुसन्धानबाट खुलेको छ ।  

पक्राउ परेकाहरुको साथबाट दुईवटा पेस्तोल, १४ राउण्ड गोली र चारवटा म्यागजिन बरामद भएको मोरङ प्रहरी प्रमुख एसपी विश्व अधिकारीले बताए । उनका अनुसार प्रहरीले बेलबारी नगरपालिका–४ बुधबारे स्कुलडाँडा भन्ने ठाउँमा नियमित चेकजाँच गरिरहेको अवस्थामा उनीहरु को १७ प ४५९६ नम्बरको मोटरसाइकलमा आएका थिए । मोटरसाइकल रोकेर खानतलासी गर्ने क्रममा उनीहरुको साथबाट हतियार बरामद भएको जानकारी अधिकारीले दिए । 

प्रहरीका अनुसार नियन्त्रणमा लिएर सोधपुछ र अनुसन्धान सुरु गरिएपछि उनीहरु मध्ये राई ‘विप्लव’ समूहको मोरङ सेक्रेटरी र धिमाल कार्यकर्ता भएको खुलेको छ । त्यसै क्रममा बेलबारीका एक व्यवसायीसँग केही समय अघिदेखि ‘विप्लव’समूहले ७ लाख रुपैयाँ चन्दा माग गरेको पनि पत्ता लाग्यो । अनुसन्धानकै क्रममा चन्दा बापत माग गरिएको रकम असुल्न जाँदै गरेको अवस्थाका दुवै जना प्रहरी ‘चेकिङमा’ परेको खुलेको हो ।  

प्रहरीले ‘विप्लव’ समूहले चन्दा माग गरिएको भनिएका व्यापारीका बारेमा भने सबै कुरा गोप्य राखेको छ । पक्राउ परेका दुवै जनाका बारेमा मोरङ प्रहरीले केही बेरमा पत्रकार सम्मेलनको आयोजना गरेर सबै कुरा सार्वजनिक गर्ने तयारी गरेको छ ।