विराटनगर : मस्जिदको सेफ्टी ट्यांकीमा निसास्सिएर मृत्यु भएका चारजनाको परिवारलाई मोरङको सुनवर्षी नगरपालिकाले आर्थिक सहयोग गर्ने भएको छ ।
सुनवर्षी–९ मुस्लिम बस्तीस्थित मर्कज मस्जिदको सेफ्टी ट्यांकीको सेट्रिङ खोल्न एकपछि अर्को गर्दै भित्र छिरेका चारजनाको गत शनिबार मृत्यु भएको थियो । मृत्यु भएकाको परिवारलाई नगरपालिकाले राहत स्वरुप जनही ५०÷५० हजार रुपैयाँ सहयोग गर्ने भएको हो ।
मेयर कालिप्रसाद दासका अनुसार राहत रकम दिने निर्णय कार्यपालिकाको बैठकले गरेको हो । ‘काजक्रिया खर्च वापत अहिले सबै गरेर २ लाख रुपैयाँ दिने निर्णय भएको छ,’ उनले भने, ‘बाँकी सहयोगका विषयमा आवश्यक छलफलपछि निर्णय लिइने छ ।’
चारजनाको मृत्यु भएपछि गत आइतबार नगरपालिकाले नगर क्षेत्रमा सार्वजनिक विदा दिएको थियो । मृत्यु हुनेमा मुस्लिम बस्तीका २० वर्षीय मोहम्मद फिरोज आलम, २५ वर्षीय सहनवाद आलम, २२ वर्षीय ओसिव आलम र ४५ वर्षीय कपिल आलम रहेका छन् । मृत्यु हुने मध्ये सहनवाद र कपिल बाबु छोरा हुन् ।
एक महिना अघि चारैतिर बन्द गरेर हावा पास हुन नसक्ने गरी मस्जिदको १२ फिट गहिरो ट्यांकीको ढलाई गरिएको थियो । त्यही ढलाईको सेट्रिङ खोल्नका लागि एकपछि अर्को गर्दै गएकाहरुको निसास्सिएर मृत्यु भएको हो । मानव स्वास्थ्यका लागि हानिकारक ग्यास लामो समयदेखि बन्द रहेको सेफ्टी ट्यांकी भित्र जम्मा भएर रहेको र एक्कासि खोलेर भित्र छिर्दा त्यसको असर एवं अक्सिजनको अभावले बेहोस भएर चारै जनाको मृत्यु भएको चिकित्सकले बताएका छन् ।
प्रतिक्रिया दिनुहोस !
