घरमुनीको जमिन भासिँदा रसुवामा ६ घरमा क्षति, एक परिवार विस्थापित
असार २४, २०७६ मंगलबार २१:३:०
नुवाकोट : अविरल वर्षाका कारण पहिरो जाँदा रसुवाको दक्षिणपूर्वी घलेगाउँमा ६ घरमा क्षति पुगेको छ। सदरमुकाम धुन्चेदेखि ३० किलोमिटर दूरीको कालिका गाउँपालिका ५ घलेगाउँमा घरमुनीबाट जमिन भासिँदा मंगलबार ६ घरमा क्षति पुगेको सहायक प्रमुख जिल्ला अधिकारी सपना भट्टराइले जानकारी दिइन्।
भट्टराईका अनुसार पहिरोले एक परिवार विस्थापित भएको छ। घरमुनी सडक खनिएको र अविरल वर्षाले जमिन भासिँदा स्थानीय श्यामबहादुर तामाङको ४ जनाको परिवार विस्थापित भएको हो। तामाङको परिवारलाई १० हजार रुपैयाँ नगद र टेन्टलगायत राहत सामग्री प्रदान गरिएको छ। उनको परिवार घर नजिकै बारीमा अस्थायी रुपमा टेन्ट हालेर बसेको छ।
पहिरोले स्थानीय गम्भीरमान तामाङ, सन्तमान तामाङ, सन्तबहादुर तामाङ, सौगात तामाङ र सार्की तामाङको घरमा क्षति पुगेका छ। उनीहरू पनि जोखिमपूर्ण रुपमा बसिरहेका छन्।
प्रहरी र स्थानीय तहका कर्मचारी घटनास्थलमा थप अनुगमनका लागि पुगेका छन्।
प्रतिक्रिया दिनुहोस !
