राखीले गरिन् बिहेको खुलासा
मुम्बई : अन्ततः बलिउडकी ड्रामा क्विन भनेर चिनिने राखी सावन्तले आफ्नो वैवाहिक बन्धनको खबर सत्य भएको खुलासा गरेकी छिन् । राखी बेलायत बस्दै आएका एनआरआई व्यापारी रितेशसँग वैवाहिक बन्धनमा बाँधिएकी हुन् । केही साता पहिले उनको दुलहीको पोसाक लगाएको तस्बिर सामाजिक सञ्जालमा भाइरल भइरहेको थियो । यसले उनले विवाह गरेको अनुमान गर्न गाह्रो थिएन । तर, राखीले कुरा लुकाउँदै भनेकी थिइन् कि मैले बिहे गरेकी छैन । यी तस्बिर त फोटोसुट मात्रै गरिएको हो ।
अन्ततः आफ्नो पुरानो भनाइ सच्याउँदै राखीले बिहे गरेको खुलासा गरेपछि उनका शुभेच्छुकहरूले बधाईको ओइरो लगाएका छन् । आफ्नो पतिबारे उनले भनेकी छिन्, ‘मेरो पहिलो अन्तर्वार्ता हेरेर उहाँ मेरो फ्यान बनिसक्नु भएको रहेछ । बिहेले मेरा परिवारका सबै सदस्य अत्यन्त खुसी छन् ।’ उनले बिहे कोर्टमा भएको बताएकी छिन् ।
अभिनेत्री राखी सावन्त विभिन्न टेलिभिजनमा पनि सो चलाउनुका साथै मोडलिङ पनि गर्छिन् । उनको रियलिटी सो ‘गजब देशकी अजब कहानी’ निकै चर्चित रह्यो । यही सिलसिलमा उनले भनेकी थिइन्, ‘बाबा रामदेव मेरा आफ्ना हुन्, राहुल गान्धी मेरा सपना हुन् ।’ उनले फिल्मी करियरको सुरुआत ‘अग्निचक्र’ बाट गरेकी थिइन् । सन् २००३ को फिल्म ‘चुरा लिया है तुमने’ को आइटम गीत ‘मोहब्बत है मिर्ची’ बाट उनले ब्रेक पाएकी थिइन् ।
यसपछि खुर्सानी शब्दबाट निकै प्रभावित भएकी उनले सन् २००१४ मा एक पार्टी पनि दर्ता गरेकी थिइन्, जसको चुनाव चिह्न हरियो खुर्सानी थियो । टीभीमा राखीको रियलिटी सो ‘राखी का स्वयंवर’ पनि निकै चर्चित थियो । उक्त सोमा उनले बारम्बार चर्चा गर्ने गरेकी थिइन् कि न उनलाई बिहेमा रुचि छ, न त बच्चा जन्माउनुमा । एजेन्सी