काठमाडौं : सुदूरपश्चिम र कर्णाली प्रदेशमा धुमधामसँग मनाइने गौरापर्व काठमाडौंमा मनाइएको छ । काठमाडौंको टुँडिखेलमा विशेष कार्यक्रमकाबीच शुक्रबार गौरापर्व मनाइएको हो । धार्मिक एवं सांस्कृतिक महत्वको गौरापर्व काठमाडौंमा पनि धुमधामसँग मनाइने गरेको छ ।
विभिन्न पेशा, व्यवसाय, अध्ययनका लागि काठमाडौं उपत्यकामा बसोबास गर्ने सुदूरपश्चिम र कर्णाली प्रदेशबासीको संख्या बाक्लिदै जाँदा काडमाडौंमा पनि यो पर्व विशेष कार्यक्रमका साथ मनाइने गरेको छ । गौरापर्वका दिन सुदूरपश्चिमका विभिन्न पार्टीका नेताकार्यकर्ताहरु टुँडिखेलमा जम्मा भएर देउडा खेल्ने गरेका छन् । शुक्रबार नेकपाका नेता भीम रावल, नेपाली कांग्रेसका नेता एनपी साउँदलगायत ठूलो संख्यामा पार्टीका नेता कार्यकर्ताहरुले संगै गौरा मनाएका थिए ।
गौरालाई सुदूरपश्चिम र कर्णाली क्षेत्रका मानिसले ऐतिहासिक मौलिक पर्वका रूपमा लिने गरेका छन् । संघीय राजधानी काठमाडौंमा पनि सुदूरपश्चिम र मध्य पश्चिम क्षेत्रका मानिसको बसोवास बढेसँगै गौरापर्व धुमधामका साथ मनाउन थालिएको छ ।
सत्य युगमा हिमालय पुत्री पार्वतीले महादेव स्वामी पाऊँ भनी वर्षा ऋतुको भाद्र महिनामा जल, जङ्गल, जमिन र जनावरको डर नमानी तपस्या गरेपछि मनोकामना पूरा भएको सम्झनामा देशको पश्चिम क्षेत्रमा यो पर्व मनाउन सुरु गरिएको किम्वदंती छ ।
गौरा पूजा गर्नका लागि पाँच वनस्पति कुश, काँस, सामा (सौँ), तीतेपाती र अपामार्ग कतै तिलको बिरुवा पनि राखेर देवीको आकार बनाउने गरिन्छ । यसरी बनाइएको देवीलाई भाद्र कृष्ण अष्टमीका दिन गाउँको सफा घरमा भित्राएर व्रतालुले निराहार बसी पूजा गर्ने परम्परा रहेको छ
बिहीबार गौरा घर र मन्दिरमा धार्मिक अनुष्ठानका साथ गौरा भित्राइएको थियो । गौरा भित्राउने दिनलाई स्थानीय भाषामा ‘ठूली गौरा’ भित्राउने दिनको रुपमा लिइन्छ । गौरा पर्वका दिन देउडा खेल्ने प्रचलन छ । विगतमा देउडामा पौराणिक कथा र देवीदेवताका गाथा समेटिने गरेपनि पछिल्लो समय भने राजनीतिक र सामाजिक विकृतिलाई देउडाका माध्यममाबाट व्यंग गर्ने गरिन्छ । गौरापर्वलाई एकताको पर्वका रुपमा लिने गरिन्छ ।
प्रतिक्रिया दिनुहोस !
