महागढीमाईमा क्रिकेट प्रतियोगिता : वीरगन्ज र हेटौडा विजयी

कलैया : बाराको महागढीमाई नगरपालिकामा बुधबारदेखि सुरु भएको टि-२० क्रिकेट प्रतियोगितामा वीरगन्ज र हेटौडा बिजयी भएका छन् । महागढीमाईस्थित रंगशालामा भएको खेलमा वीरगन्जले आयोजक महागढीमाई स्पोर्टस् क्लब र महावीर क्रिकेट क्लब हेटौडाले कलैया क्रिकेट क्लबलाई पराजित गरेको हो । 

लेट्स प्ले स्पोर्टसको आयोजनामा सुरु भएको प्रतियोगिताको उद्घाटन खेलमा आयोजकविरुद्ध वीरगन्ज युथ क्रिकट क्लबले ६ विकेटको जीत हात पार्‍यो । समय अभावका कारण १० ओभरमा छोट्याइएको खेलमा वीरगन्जले टस जितेर ब्याटिङ गर्दै चार विकेट गुमाएर १३६ रनको योगफल तयार पारेको थियो । उसका लागि म्यान अफ दि म्याच समिम अंसारीले जोडे । 

जवाफी ब्याटिङमा उत्रिएको आयोजकले वीरगन्जको चुनौतीको सामना गर्न सकेन् । १३७ रनको लक्ष्य लिएर मैदानमा उत्रिएको आयोजकले १० ओभरमा दुई विकेट गुमाएर ५२ रन मात्रै जोड्न सक्यो ।

यसैगरी दोस्रो खेलमा हेटौडाले कलैया क्रिकेट क्लबमाथी एक विकेटको जीत दर्ता गरेको हो । निर्धारित २० ओभरमा टस जितेर ब्याटिङ रोजेको कलैयाले आफ्नो सम्पूर्ण विकेट गुमाएर ७२ रन मात्र जोड्न सक्यो । कलैयालाई सस्तैमा समेटने क्रममा हेटौडाका रामनरेश गिरिले उत्कृष्ट बलिङ गर्दै पाच विकेट लिए । कलैयाले प्रस्तुत गरेको लक्ष्य पछ्याउनमा मैदानमा आएको हेटौडाले १५ ओभरमा ९ विकेट गुमाएर पुरा गर्‍यो । 

विभिन्न ६ टीमको सहभागिता रहेको प्रतियोगिताको विजेताले दुई लाख र उपविजेताले एक लाख प्राप्त गर्नेछ । प्रतियोगिता अन्तर्गत बिहीबार पहिलो खेलमा युनाइटेड क्रिकेट क्लब र महावीर क्रिकेट क्लब भिड्नेछन् भने दोस्रो खेल काठमाडौं र आयोजकबीच हुने प्रतियोगिता निर्देशक प्रबल गौतमले जानकारी दिए । प्रतियोगिताको उद्घाटन महागढिमाई नगरपालिकाका मेयर उपेन्द्र यादवले गरेका थिए ।