नरपानीमा कार दुर्घटना : एकै परिवारका तीनजनाको मृत्यु, दुई घाइते (अपडेट)
कात्तिक २०, २०७६ बुधबार १४:२६:०
सन्धिखर्क : सन्धिखर्कको नरपानीमा बुधबार बिहान भएको कार दुर्घटनामा एकै घरका ३ जनाको मृत्यु भएको छ । २ जना घाइते भएका छन्। घाइतेमध्ये एकजनाको अवस्था गम्भीर छ। गोरुसिङ्गे-सन्धिखर्क सडकखण्डको नरपानीमा बा १७ च ६९१७ नम्बरको कार दुर्घटना हुँदा एकै घरका ३ जनाको घटनास्थलमै मृत्यु भएको जिल्ला प्रहरी कार्यलय अर्घाखाँचीका प्रहरी नायव उपरीक्षक प्रकाश बिष्टले बताए।
दुर्घटनामा २ जना घाइते भएका छन्। कार रुपन्देहीको सैनामैनाबाट सन्धिखर्क आउँदै थियो । मृत्यु हुने र घाइते हुने सबै एकै परिवारका रहेका छन् । दुई भाइ छोरा र आमाको मृत्यु भएको छ । एक भाई र उनैका जेठा दाजुका छोरा घाइते भएका हुन्।
घटनामा रुपन्देहीको सैनामैना नगरपालिका २ मुर्गियाकी ८० वर्षीय दुर्गादेवी खड्का, उनका छोरा ४३ वर्षीय भक्तबहादुर खड्का र अर्का छोरा ३९ वर्षीय तिलबहादुर खड्काको घटनास्थलमै मृत्यु भएको हो ।
घाइते हुनेमा चालक ४९ वर्षीय गंगाबहादुर खड्का र निजका जेठो दाजुका छोरा २५ वर्षीय विनोद खड्का रहेका छन्। घाइतेको प्राथमिक स्वास्थ्य केन्द्र ठाडामा उपचार पछि थप उपचारका लागि बुटवल पठाइएको छ।
अर्घाखाँचीको पाणिनि गाउँपालिका ७ अड्गुरीको झन्द्रेकमा पहाड घर भएका उनीहरु रुपन्देही जिल्लाको सैनामैना नगरपालिका २ मुर्गियामा बस्दै आएका थिए । अड्गुरीको झन्द्रेकमा रहेको घर जग्गामा गाउँकाले खेती गर्दै आएको र उक्त जग्गा पास दिनका लागि उनीहरु सन्धिखर्क आउँदै गरेको उनका आफन्तले जनाएका छन्।
कार सडकबाट करिब एक सय ५० मिटर तल खसेको छ । ओरालो बाटोमा तीब्र गतिका कारण दुर्घटना भएको प्रारम्भिक अनुसन्धानबाट देखिएको जिल्ला ट्राफिक प्रहरी कार्यलय अर्घाखाँचीले बताएको छ।
प्रतिक्रिया दिनुहोस !
