परासी: नवलपरासीको एक सहकारी संस्थाले बचतकर्ताको ५८ लाख बढी रकम ठगी गरेको छ । ठगी अभियोगमा दुईजनामाथि मुद्दा चलाइएको छ । एकजना पक्राउ परेका छन् । जिल्लाको बर्दघाट नगरपालिका–९ स्थित पञ्चनगर आयआर्जन बचत तथा ऋण सहकारी संस्था लिमिटेडले रकम हिनामिना गरेको उजुरी परेपछि प्रहरीले अनुसन्धान अघि बढाएको थियो ।
अनुसन्धानका क्रममा संस्थाका अध्यक्ष तीर्थराज चौधरी पक्राउ परेको जिल्ला प्रहरी कार्यालयका सूचना अधिकारी डीएसपी मदन थापाले जानकारी दिए । अर्का एकजना फरार रहेका छन् । सुरुमा ११ जना बचतकर्ताले रकम ठगी गरेको उजुरी दिएका थिए ।
त्यसपछि बचत रकम फिर्ताका लागि पहल गरिएको थियो तर,संस्थाले रकम खर्चको स्पष्ट हिसाब दिन नसकेको र बचकर्ताको रकम फिर्ता दिन नसकेपछि प्रहरीले दुई जनामाथि ‘सहकारी ठगी’मा मुद्दा चलाएको हो ।
अहिलेसम्म ४० जना बचतकर्ताहरूको उजुरी आएको र उनीहरूको झन्डै १२ लाख रकम फिर्ता गर्न बाँकी रहेको प्रहरीले जनाएको छ । ४०९ जना शेयर सदस्य रहेको संस्थाले ५८ लाख बढी रकम हिनामिना भएको प्रहरीको प्रारम्भिक अनुसन्धानबाट खुलेको छ ।
यसैबीच,रकम ठगीका पीडित बचतकर्ताहरूलाई सम्पर्कमा आउन इलाका प्रहरी कार्यालय बर्दघाटले सूचना जारी गरेको छ ।
प्रतिक्रिया दिनुहोस !
