प्रेमीसँग मिलेर छोरीकै अगाडि श्रीमानको हत्या, प्रेमीलाई यसरी पठाइन् लाइभ लोकेसन

भारत : पुणेको सिया गोयल हत्या प्रकरणको अनुसन्धान अझै पूरा नभएको अवस्थामा आन्ध्र प्रदेशबाट पनि यस्तै प्रकृतिको अर्को हत्याकाण्ड बाहिरिएको छ । यहाँकी एक महिलाले आफ्ना प्रेमीसँग मिलेर आफ्नै छोरीकै अगाडि श्रीमानको हत्या गराएको आरोप लागेको छ । प्रहरीका अनुसार महिला र युवकबीच लामो समयदेखि प्रेम सम्बन्ध थियो ।

घटनामा संलग्न महिला तथा अन्य सबै आरोपीलाई पक्राउ गरी अनुसन्धान भइरहेको छ । आन्ध्र प्रदेशको चित्तुर जिल्लाको शान्तिपुरमकी १९ वर्षीया हासिनीमाथि २३ वर्षीय श्रीमान रमेशको हत्या गराएको आरोप लागेको छ । उनीहरूको करिब दुई वर्षअघि विवाह भएको थियो र एक सानी छोरी पनि छिन् । रमेश एक निजी कम्पनीमा कार्यरत थिए ।

विवाहपछि पनि प्रेम सम्बन्ध जारी

भारतीय सञ्चारमाध्यमका अनुसार हासिनी र २० वर्षीय युगान्धरबीच विवाहअघि नै मित्रता थियो, जुन विवाहपछि पनि प्रेम सम्बन्धमा परिणत हुँदै निरन्तर रह्यो । यही सम्बन्धका कारण दुवैले रमेशको हत्या गर्ने योजना बनाएको प्रहरीको भनाइ छ । प्रहरीले सीसीटीभी फुटेज, मोबाइल फोनको प्राविधिक विवरण र अन्य डिजिटल प्रमाणका आधारमा आरोपीहरूलाई पक्राउ गर्न सफल भएको जनाएको छ ।

लगातार लाइभ लोकेसन पठाउँदै थिइन्
प्रहरीका अनुसार हासिनीले मंगलबार श्रीमान रमेशलाई गुडुपल्ले मण्डलस्थित श्री मल्लेश्वर स्वामी मन्दिर दर्शन गर्न जान आग्रह गरेकी थिइन् । उनीहरू आफ्नी सानी छोरीसहित मोटरसाइकलमा मन्दिरतर्फ गइरहेका थिए । यात्राका क्रममा हासिनीले प्रेमी युगान्धरलाई निरन्तर आफ्नो लाइभ लोकेसन पठाइरहेकी थिइन्, जसका कारण हमलाकारीहरूले उनीहरूको गतिविधि सजिलै पछ्याउन सकेको प्रहरीको दाबी छ ।

पर्स खसालेर दिइन् संकेत
अनुसन्धानका क्रममा हासिनीले जानाजानी आफ्नो पर्स बाटोमा खसालेको आशंका गरिएको छ । पर्स उठाउन रमेशले गाडी रोक्ना साथ त्यो हमलाको संकेत बनेको बताइएको छ । त्यसपछि युगान्धर र उनका केही साथी लुकेर बसेको स्थानबाट बाहिर निस्किए । उनीहरूले रमेशलाई करिब १०० मिटरसम्म लखेटेपछि धारिलो हतियार प्रयोग गरी हत्या गरेको प्रहरीले जनाएको छ । घटना हुँदा दम्पतीकी सानी छोरी पनि नजिकै रहेको बताइएको छ।

सीसीटीभी र फोन विवरणबाट खुल्यो रहस्य
मन्दिर जाने बाटोका सीसीटीभी फुटेजमा रमेश आफ्नी श्रीमतीसँग मन्दिरतर्फ गएको देखिएको थियो । तर केही समयपछि हासिनी रमेशकै सवारी साधनमा दुई जना पुरुषसँग फर्किरहेको दृश्य देखिएपछि प्रहरीलाई शंका लागेको थियो । त्यसपछि फोन रेकर्ड, लोकेसन डेटा तथा अन्य प्रमाणको विश्लेषण गर्दा रमेशको शव फेला परेको प्रहरीले जनाएको छ । 

आमाको उजुरीपछि अनुसन्धान
हासिनीकी आमाले छोरी र नातिनी लामो समयदेखि सम्पर्कविहीन भएको भन्दै प्रहरीमा उजुरी दिएपछि घटनाको अनुसन्धान सुरु भएको थियो । त्यसक्रममा अनुसन्धान अघि बढ्दै जाँदा हत्या प्रकरणको खुलासा भएको हो ।

सिया गोयल प्रकरणसँग मिल्दोजुल्दो घटना
यस घटनालाई हाल चर्चामा रहेको पुणेको सिया गोयल हत्या प्रकरणसँग तुलना गरिएको छ । उक्त घटनामा २० वर्षीया सिया गोयलले आफ्ना २२ वर्षीय प्रेमी चेतन चौधरीसँग मिलेर हुनेवाता पति केतन अग्रवालको हत्या गरेको आरोप छ । प्रहरीका अनुसार उनीहरूले जुन १८ मा लोनावलास्थित लोहागढ किल्लामा घुम्न गएको बेला केतनलाई उचाइबाट धकेलेर हत्या गरेका थिए ।