बैतडी : भ्रमण वर्ष २०२० को अवसरमा बैतडीको सीमा नाका झुलाघाटमा भारतीय पर्यटकलाई नेपाली टोपी, खाँदा र फूलमालाले स्वागत गरिएको छ । भ्रमण वर्षको सुरुवातको अवसरमा बाजागाजा सहित झुलाघाटमा पर्यटकहरुलाई स्वागत गरिएको हो ।
भ्रमण वर्षको पहिलो दिनमा पर्यटकहरुलाई सीमा नाकामै पुगेर स्वागत गरिएको प्रमुख जिल्ला अधिकारी आनन्द पौडेलले बताए । ‘हामीले नेपालमा भ्रमण वर्षको सुरुवात भएको सन्देश दिनका लागि सीमा नाकामै कार्यक्रमको आयोजना गर्यौं । सीमा नाकाबाट भित्रने पर्यटहरुलाई स्वागत पनि गर्यौं’, उनले भने, ‘नेपाल र भारतबीच सामाजिक तथा सांस्कृतिक सम्बन्ध रही आएको छ । हाम्रो रोटीबेटीको सम्बन्ध पनि छ । यसलाई प्रगाढ बनाउन कार्यक्रम आयोजना गरेका हौं ।’
पर्यटकलाई लक्षित गरेर सीमा नाकामा स्वागतद्वारसमेत राखिएको छ । 'घुम्न जाऔँ दशरथचन्द' अंकित ब्यानरसहित स्वागतद्वार राखिएको नगरपालिकाका प्रमुख नरेन्द्रसिंह थापाले बताए । उनले भने, ‘भ्रमण वर्षमा पर्यकटलाई भित्र्याउनका लागि हामीले 'घुम्न जाऔं दशरथचन्द' अभियान सञ्चालन गरेका छौं । पर्यटक भित्र्याउन नगरपालिकाले पनि पहल गरिरहेको छ ।’
बैतडीमा थुप्रै भारतीय पर्यटक आउने गरेका छन् । भ्रमण वर्षमा उनीहरुलाई थप आकर्षित गर्नका लागि नगरपालिकाले ‘घुम्न जाऔं दशरथचन्द अभियान’सञ्चालन गरेको उपप्रमुख मीना चन्दले बताइन् । उनले भनिन्, ‘सीमावर्ती भारतीय जिल्लाहरुबाट दशैंको बेला, चैतको नवरात्रीको बेला थुप्रै धार्मिक पर्यटकहरु आउने गरेका छन् । उनीहरुलाई लक्षित गरेर हामीले यो अभियान सञ्चालन गरेका हौं ।’
बैतडीमा त्रिपुरासुन्दरी, निङ्गलाशैनी, मेलौली, डिलाशैनी, पातालभुवनेश्वर, रौलाकेदार, सिगासधुरा, ग्वाल्लेक केदार, उदयदेव शिवनाथ लगायतका धामहरुमा धार्मिक पर्यटक भित्र्याउन सकिने सम्भावना रहेको छ ।
प्याराग्लाइडिङ नियमित
भ्रमण वर्षलाई लक्षित गरेर बैतडीको पाटनमा प्याराग्लाइडिङ सेवा नियमित गरिएको छ । बैतडी अमेजिङ एडभेन्चर्स प्रालिले प्याराग्लाइडिङ सेवा सेवा सुरु गरेको हो । पाटनमा प्याराग्लाइडिङ सफल परीक्षणपछि भ्रमण वर्षको अवसर पारेर प्याराग्लाइडिङ सेवा नियमित गरिएको प्रालिका सञ्चालक कृष्णप्रसाद जोशीले बताए । उनले भने, ‘भ्रमण वर्षमा पर्यटक तान्नका लागि हामीले प्याराग्लाइडिङ सेवा सुरु गरेका हौं । यसले आन्तरिक तथा बाह्य पर्यटक भित्र्याउनमा सहयोग पुग्नेछ ।’
प्याराग्लाइडिङको सफल परीक्षण भएकाले पाटनमा यो व्यवसाय राम्रोसंग सञ्चालन हुन सक्ने जिल्ला खेलकुद विकास समितिका अध्यक्ष चमनकुमार भण्डारीले बताए । उनले भने, ‘प्याराग्लाइडिङको सफल परीक्षणले यो क्षेत्रमा यो व्यवसाय फस्टाउने देखिन्छ ।’
प्याराग्लाइडिङ सञ्चालनले जिल्लाको पर्यटन विकासमा टेवा पुग्ने जिल्ला समन्वय समितिका प्रमुख सिद्धराज भट्टले बताए । उनले भने ,‘पर्यटकीय क्षेत्रहरुको प्रचारप्रसार र विकासका लागि स्थानीय सरकारले पनि योजना अघि ल्याउनुपर्ने हुन्छ ।’
प्रतिक्रिया दिनुहोस !
