डडेल्धुरा : सुधीस भारतको उत्तरप्रदेश राज्यको राजधानी, लखनउका बसिन्दा हुन् । शुक्रबार अपराह्न उनी र उनका साथी बालबच्चासहित डडेल्धुराको हगुल्टे लेकमा भेटिए । पहिलो पटक उनले, यती नजिक हिउँ देखेको बताए ।
‘हामीहरुले हिउँ देखेको नै पहिलो पटक हो’ उनले भने । भारतमा सरकारी जागिरे सुधीसले, यसपाली भारतको उत्तराखण्ड राज्यमा पर्ने मन्सुरीमा हिमपातको आनन्द लिने योजना बनाएका थिए । तर उनको त्यो योजना डडेल्धुरातिर मोडियो ।
‘हामी परिवारसहित मन्सुरी जाने योजनामा थियौं, तर नेपालमा भ्रमण वर्ष सुभारम्भ भएको र इन्टरनेटमा सबैभन्दा नजिक डडेल्धुरामा हिमपात भएको थाहा पायौं, अनि यतै आएको’, उनले भने ।
भारतकै लखिमपुरका मुरली मौर्या व्यवसायी हुन् । उनी हरेक वर्ष हिमपातमा परिवारसहित घुम्ने योजना बनाउँछन् । यसअघि भारतको उत्तराखण्डतिर हानिएका मौर्याको परिवार पनि हगुल्टे लेकमा भेटियो ।
‘हिमपातको आनन्द बेग्लै हुन्छ, सबैभन्दा बढी रमाइलो बच्चाहरु गर्छन्, बच्चाहरुले रमाइलो गरेको देखेर आनन्द आउँछ ।', आफ्ना साना दुई जुम्ल्याहा छोरीसहित हगुल्टे पुगेका मौर्याले भने ।
यसवर्ष सुदूरपश्चिममा दोस्रो पटक भारी हिमपात भएको छ । हगुल्टे लेकसहित डडेल्धुरा सदरमुकाम र बैतडीमा तीन फिट भन्दा बढी हिउँ परेको छ । सुदूरपश्चिमको राजधानी धनगढीबाट १२५ किलोमिटरको पक्की सडकको यात्रा गरेपछि हिउँ हेर्न पाइन्छ ।
‘नेपालमा सबैभन्दा बढी पर्यटक भित्र्याउन सकिने भनेको भारतीय नै हो, अझ सुदूरपश्चिममा त भारतको राजधानी सहितका ठुला-ठुला शहरका पर्यटक सडक मार्गबाटै चार-पाँच घण्टाको यात्रामा पुग्न सक्छन्’, सुन्दर सुदूरपश्चिम अभियानका अभियानकर्ता गोपाल हमालले भने ।
उनले गोरो छाला भएका पर्यटक भित्र्याउन अझै समय लाग्ने भएकाले सुदूरपश्चिमले भारतीय पर्यटकलक्षित कार्यक्रम ल्याउनुपर्ने बताए ।
प्रतिक्रिया दिनुहोस !
