राष्ट्रियसभा निर्वाचन : सुदूरपश्चिम प्रदेशमा दुई पदका लागि चारजनाको उम्मेदवारी
माघ ९, २०७६ बिहीबार १०:५९:०
डोटी : राष्ट्रियसभा सदस्यका लागि सुदूरपश्चिम प्रदेशमा निर्वाचन सुरु भएको छ । दिपायल सिलगढी नगरपालिकास्थित पद्म पब्लिक मुक्तिनारायण उच्च माविको मतदान स्थलमा निर्वाचन भइरहेको हो ।
निर्वाचन बिहान १० बजेदेखि सुरु भइसकेको छ । शान्तिपूर्ण तरिकाले मतदान सुरु भएको निर्वाचन अधिकृत बिदुर काफ्लेले बताएका छन् । निर्वाचन बेलुकी ४ बजेसम्म हुने बताइएको छ ।
सुदूरपश्चिमबाट एक खुल्ला र एक महिला गरी दुईजना राष्ट्रियसभा सदस्यको लागि निर्वाचन भइरहेको हो । दुईजनाका लागि चारजनाको उम्मेदवारी परेको छ । दुईजना नेपाली कांग्रेसको तर्फबाट र दुई जना सत्तारुढ दल नेकपाको तर्फबाट उम्मेदवार रहेका छन्।
सुदूरपश्चिम प्रदेशका सबै प्रदेशसभा सदस्य, स्थानीय तहका प्रमुख तथा उपप्रमुख निर्वाचनमा भाग लिन जिल्लामा आइसकेका छन् भने अहिले मतदान भइरहेको छ । मतदाता लाइनमा लागेर शान्तिपूर्ण तरिकाले मतदान गरिरहेका छन् ।
सत्तारुढ नेपाल कम्युनिस्ट पार्टीका तर्फबाट खुल्लातर्फ तारामान स्वाँर र महिलातर्फ शारदा भट्टको उम्मेदवारी दिएका थिए भने नेपाली कांग्रेसका तर्फबाट महिलातर्फ तुलसी देवकोटा र खुल्लामा प्रताप ठगुन्नाले उम्मेदवारी दिएका हुन् ।
सुदूरपश्चिम प्रदेशमा ८८ स्थानीय तहका प्रमुख तथा उपप्रमुख एक सय ७६ र प्रदेश सभा सदस्य ५३ जना गरी जम्मा दुई सय २९ मतदाता रहेका छन् ।
स्थानीय तहका प्रमुख तथा उपप्रमुखको मतभार १८ का दरले तीन हजार एक सय ६८ र प्रदेश सभाका ५३ जना सांसदको मतभार ४८ का दरले दुई हजार पाँच सय ४४ गरी सुदूरपश्चिम प्रदेशमा कुल पाँच हजार ७ सय १२ मतभार रहेको छ ।
२०७४ माघमा भएको राष्ट्रिय सभा निर्वाचनमा सुदूरपश्चिमबाट खुल्लातर्फ निर्वाचीत सांसद नेपाली कांग्रेसका बद्री पाण्डे र महिलातर्फबाट निर्वाचीत भएकी नेकपाकी सांसद कमला ओलीको पदावधि दुईवर्ष कायम भएको थियो । उनीहरुको रिक्त हुन लागेको ठाउँमा निर्वाचन हुन लागेको हो।
प्रतिक्रिया दिनुहोस !
