मास्क र सेनिटाइज कालोबाजारी गर्ने चारजना पक्राउ
जनकपुरधाम : कालोबजारीको आरोपमा जनकपुरबाट चार जना पक्राउ परेका छन्। विश्वभरी महामारीको रुपमा फैलिएको कोरोना भाइरसको संक्रमणबाट बच्न प्रयोग गरिने मास्क र सेनेटाइजर लुकाएर चर्को मूल्यमा बिक्री वितरण गरेको आरोपमा पक्राउ परेका हुन्।
जिल्ला प्रशासन कार्यालय धनुषा र जिल्ला प्रहरी कार्यालयबाट खटेको अनुगमन टोलीले मास्क र सेनिटाइजरको कालोबाजारी गर्ने चार जनालाई पक्राउ गरेको हो।
जनकपुरधाम उप–महानगरपालिका ४ स्थित सुस्मिता मेडिकलका सञ्चालक सर्लाही जिल्ला बरहथवा नगरपालिका ८ का संजय साह, सम्पूर्ण मेडिकलबाट जनकपुरधाम उप–महानगरपालिका ४ का ३२ वर्षीय संजय साहलाई मास्कको कालोबजारी गरिरहेको अवस्थामा पक्राउ हो।
त्यस्तै जनकपुरधाम ८ भमरपुरा चौकस्थित अटल फार्मेसीबाट लक्ष्मीनिया गाउँपालिका ३ का २६ वर्षीय अनिल यादव र महोत्तरी जिल्लाको जलेश्वर नगरपालिका ६ का ३० वर्षीय प्रभन्स चौधरीलाई सेनिटाइजरको कालोबाजारी गरेको आरोपमा पक्राउ गरेको धनुषाका प्रहरी उपरीक्षक रमेशकुमार बस्नेतले जानकारी दिए।