वीरगन्ज : कोरोना भाइरसको संक्रमण भेटिएलगतै सरकारले देशलाई पूर्णरुपमा लक डाउन गर्ने निर्णयसँगै वीरगन्जमा पनि मङगलबार बिहान ६ बजेदेखि लक डाउन भएको छ ।
लकडाउनको शुरुवातमा वीरगन्जका सडकमा मानिसको चहलपहल देखिए पनि १० बजे पछि भने निक्कै कम हुँदै गएको छ ।
एक दुईवटा फाटफुट मोटरसाइकल, साइकलमा मानिस आवतजावत गरिरहेका छन् । लकडाउनको समयमा घरबाट बाहिर ननिस्कन प्रशासनले कडाई गरेपनि केहिले भने अटेर गरेका छन् ।
यसरी अटेर गरेर सवारी साधन चलाउने र साइकलमा आवत जावत गर्नेहरुलाई प्रहरीले चोक चोकमा रोकेर फर्काइ रहेको छ । वीरगन्ज महानगर क्षेत्रमा धेरै ठाउँमा प्रहरीले चेकजाँच पनि गरिरहेको छ ।
अटेर गर्नेहरुको मोटरसाइकल प्रहरीले नियन्त्रणमा लिन थालेको जिल्ला ट्राफिक प्रहरी कार्यालय पर्साका प्रहरी निरीक्षक कमलराज पण्डितले जानकारी दिए ।
सरसफाइ गर्ने कर्मचारीलाई प्रहरीले लखेट्यो
लकडाउनको समयमा सरसफाइका लागि निस्किएका वीरगन्ज महानगरपालिकाका कर्मचारीलाई प्रहरीले लखेटेको छ । मङगलबार बिहान घण्टाघरमा सरसफाइका लागि गएका महानगरपालिकका कर्मचारीहलाई दुईवटा भ्यानमा आएको प्रहरीले भगाई दिएको महानगरपालिकाका कर्मचारी शिव गुप्ताले बताए ।
उनले महानगरपालिकाको सरसफाई शाखाका सवारी चलाउने चालकहरुलाई समेत आउन नदिएको गुनासो गरे । महानगरको ग्रामीण क्षेत्रबाट आउने सवारी चालकहरुलाई महानगरले वितरण गरेको परिचय देखाउँदा समेत प्रहरीले रोक्ने गरेको उनले बताए ।
सरसफाइका लागि सवारी चलाएर आउने चालकहरुलाई आईसीपी, श्रीपुर, पावर हाउसलगायतका स्थानहरुमा प्रहरीले अवरोध गरेको हो । पर्साका सहायक प्रमुख जिल्ला अधिकारी ललित कुमार बस्नेतले आपूmहरुकोमा जानकारी नआएको र कर्मचारीहरुले परिचय पत्र नलिएकोले त्यस्तो भएको हुनसक्ने बताउँदै थप जानकारी लिने बताए ।
प्रतिक्रिया दिनुहोस !
