वीरगन्ज : 'लक डाउन' पछि घर फर्किन नपाएर वीरगन्जका रिक्सा ग्यारेजमा भोकभोकै अलपत्र परेका रिक्सा चालकहरूलाई शुक्रबार निशुल्क खाद्यान्न सामाग्री वितरण गरिएको छ । 'लक डाउन' पछि भोकभोकै रिक्सा चालक' शीर्षकमा शुक्रबारको अन्नपूर्णपोष्ट दैनिकमा प्रकाशन भएको थियो ।
अन्नपूर्णपोष्टको समाचार पढेका वीरगन्जका युवाले शुक्रबार दिउँसो पानगल्ली, भिस्वा , बसपार्क र पानीट्यांकीमा रहेका रिक्सा ग्यारेजमा पुगेर रिक्सा चालकलाई चामल, दाल, आलु, प्याज, तेल र साबुन बाडेका हुन् ।
समाजवादी विधार्थी युनियनका नेता निखिल वर्णवाल, रोहित वर्णवाल, पुरुषोत्तम गुप्ता, राजन कलवार र निरज साह कानुले शुक्रबार ३५ जना रिक्सा चालकलाई एक साताका लागि खान पुग्ने खाद्यान्न सामाग्री बाडेका हुन् ।
जनही साढे ३ केजी चामल, आधा केजी दाल, आधा लिटर तेल, एक केजी आलु, १ केजी प्याज, १ केजी नुन र एक थान साबुन बाडिएको निखिल वर्णवालले जानकारी दिए ।
शुक्रबारको अन्नपूर्णपोष्टको समाचार पढेपछि आफुहरुले ग्यारेजमा अलपत्र परेका रिक्सा चालकलाई एक साताका लागि खान पुग्ने खाद्यान्न बाडेको उनले बताए । अन्य ग्यारेजमा पनि अलपत्र परिरहेका बारेमा खोजी गरिरहेको भन्दै उनले ती ग्यारेजमा पनि पुगेर खाद्यान्न बाड्ने बताए ।
कोरोना संक्रमणबाट जोगिन देशभर मङगलवारदेखि लकडाउन भएपछि वीरगन्जमा झण्डै डेढ सय रिक्सा चालक ग्यारेजमै अलपत्र परेका छन् । ४ दिनदेखि बजारमा रिक्सा लिएर निस्किन नपाएकाले ग्यारेजमै रिक्सा थन्क्याएर बसेका रिक्सा चालकसँगग बिहान बेलुकी खाना खाने पैसा पनि सकिएको छ ।
प्रतिक्रिया दिनुहोस !
