ट्युबमा महाकाली तरेर आएका भन्छन् : परदेशको पीडा स्वदेशको क्वारेन्टाइनले मेटायो

बैतडी : जिल्लाको सुर्नया गाउँपालिका ८ ढोलेका वीरबहादुर बोहरा भारतीय क्वारेन्टाइनमा बस्न नसक्दा जोखिम मोलेर गएको साता ट्युबमार्फत महाकाली तरेर नेपाल भित्रिए । नेपाल भित्रिने बित्तिकै सुर्नया गाउँपालिकाले गाडीको बन्दोबस्ती गरेर उनीसहित चार जनालाई गाउँमै बनाएको क्वारेन्टाइनमा पुर्‍यायो । भूमीराज आधारभूत विद्यालयको क्वारेन्टाइनमा बसेको बोहरालाई क्वारेन्टाइनमा एक हप्ता बितेको पत्तै भएन । उनले भने, ‘भारतको क्वारेन्टाइनभन्दा त हामीलाई धेरै राम्रो भएको छ । एक विद्यालयमा हामी अलग अलग बेडमा बस्न पाएका छौं । दुई पटक खाना र दुई पटक नास्ताको व्यवस्था गरिएको छ ।’

सुर्नया गाउँपालिका ८ ढोलेस्थित भूमीराज आधारभूत विद्यालयमा अहिले २४ जना क्वारेन्टाइनमा बसिरहेका छन् । क्वारेन्टाइनमा नियमित स्वास्थ्यकर्मीले ज्वरो चेकजाँच गर्ने गरेको अर्का स्थानीय हिमाल बोहराले बताए । उनले भने, ‘भारतको क्वारेन्टाइनमा केही सुविधा नहुँदा हामी ट्युबमार्फत स्वदेश फर्केका हौं । गाउँको क्वारेन्टाइनमा बस्न हामीलाई केही अप्ठ्यारो छैन् ।’

जिल्लाको पुर्चौंडी नगरपालिका ८ मल्लादेहीका नरबहादुर बोहरा पनि गएको साता ट्युबमार्फत महाकाली तरेर स्वदेश फर्किए । उनी अहिले गाउँकै एक विद्यालयमा बनाइएको क्वारेन्टाइनमा बसेका छन् । उनीसंगै अरु ८ जना पनि क्वारेन्टाइनमै छन् । उनले भने, ‘भारतमा भोगेको पीडा गाउँको क्वारेन्टाइनले बिर्साएको छ । भारतमा हामी तीन दिन भोकै बसेका हौं । यता दिनको दुई पटक खाना,नास्ता र सरसफाईको सामग्रीको व्यवस्था छ । कोठामा अलग अलग बेड छन् । उताको भन्दा धेरै सजिलो भएको छ ।’

क्वारेन्टाइनमा बसेकाको दैनिक स्वास्थ्य परीक्षण गर्ने गरिएको मल्लादेही स्वास्थ्यचौकीका इन्चार्ज हेमराज भट्टले बताए । उनले भने, ‘क्वारेन्टाइनमा बसेका नागरिकको हामीले दैनिक स्वास्थ्य परीक्षण गर्ने गरेका छौं । उहाँहरू सबैको स्वास्थ्य अवस्था ठीक छ ।’

जिल्लाको पञ्चेश्वर गाउँपालिकाको कुलाउ मावि क्वारेन्टाइनमा पनि भारतबाट फर्केका नागरिक बसेका छन् । त्यो क्वारेन्टाइनमा महिलाका लागि समेत अलग बस्ने व्यवस्था मिलाएको गाउँपालिका उपाध्यक्ष बीना भट्टले बताइन् । उनले भनिन्, ‘अहिले कुलाउ माविका सुर्खेत घर भएका र भारतमा काम गरेर फर्केका नागरिक बसिरहेका छन् । क्वारेन्टाइनमा दुई जना महिला र दुई बालबालिका पनि छन् । उनीहरूको हामीले अलग बस्ने व्यवस्था मिलाएका छौं ।’

जिल्लाभरीका स्थानीय तहमा बनाएका क्वारेन्टाइनमा हालसम्म ५ सय बढी नागरिक बसेका छन् । उनीहरु धेरै जसो भारतबाट फर्केका स्वास्थ्य कार्यालयका प्रमुख योगेशप्रसाद भट्टले बताए । 'क्वारेन्टाइनमा बसेका नागरिक सामाजिक दुरी कायम गरेर बसेका छन् । हामीले पनि धेरै ठाउँमा अनुगमन गर्दा क्वारेन्टाइनका न्यूनतम मापदण्ड पूरा गरिएका पाइएको छ’,भट्टले भने ।