काठमाडौं : संयुक्त राष्ट्र जनसङ्ख्या कोष (यूएनएफपीए)ले नेपाल सरकारलाई १२ सय पीपीई किट्स हस्तान्तरण गरेको छ । नेपाल, चीन र यूएनएफपीएबीचको साझेदारी पहल अन्तर्गत चीन सरकारबाट उपलब्ध किट्सहरु प्रदान गरिएको हो ।
तीन करोड ४ लाख ८० हजार रुपैयाँ बराबरको पीपीई किट्समा सर्जिकल मास्क, एन ९५ मास्क, फेस सिल्ड, आइ गगल्स्, हेड कभर्स, शुकभर्स, लङ स्लिभ्इम्पर्भियस गाउन, डिस्पोजेबल ब्यागर गम्बुट्स रहेका छन् ।
पीपीई किट्सहरु ग्रहण गरेपछि स्वास्थ्य तथा जनसंख्या मन्त्रालय, स्वास्थ्य सेवा विभाग व्यवस्थापन महाशाखाका निर्देशक भोगेन्द्र डोटेलले भने, 'यी किट्सहरु सही सयममा आइपुगेका छन् ।' यसले कोभिड–१९ को महामारीविरुद्धको लडाइँमा महत्वपूर्ण र ठूलो सहयोग पुग्ने विश्वास व्यक्त गर्दै सहयोग गरेकोमा यूएनएफपीए र चीन सरकारलाई धन्यवाद छ ।
'नेपालमा काम गरिरहेको विश्व स्वास्थ्य सङ्गठन (डब्लुएचओ) र अन्य राष्ट्रसंघीय निकायहरूसँगै रहेर यस महामारीको पूर्वतयारी र प्रतिकार्यमा नेपाल सरकारलाई सहयोग गर्न यूएनएफपीए तयार छ,' नेपालका लागि यूएनएफपीएका देशीय प्रतिनिधि लुब्ना बाकीले भने ।
यूएनएफपीएले सरकार र साझेदारहरूलाई जीवनरक्षाका लागि अत्यावश्यक प्रजनन स्वास्थ्य सेवाहरूको निरन्तरता सुनिश्चित गर्न आव्हान गरिरहेको छ ।
यस्तैपीपीई किट्सको अतिरिक्त यूएनएफपीएले सरकार र स्थानीय साझेदारहरूसँगको समन्वयमा कोभिड–१९ कोे महामारीमा क्वारेन्टाइनमा बसेका महिला र किशोरीहरूको तत्काल सरसफाई र सुरक्षाका आवश्यकताहरू सम्बन्धी मर्यादा किट (डिग्निटी किट्स) प्रदान गरिरहेको छ ।
यी किट्समा १४ किसिमका फरक फरक सामानहरु जस्तै साबुन, पुनः प्रयोग गर्न मिल्ने महिनावारी प्याड, र महिला तथा किशोरीहरुका लागि आवश्यक अन्य सामाग्रीहरु समावेश रहेका छन्।
प्रतिक्रिया दिनुहोस !
