डोटी : डोटीको शिखर नगरपालिका वडा नम्बर ८ गोपघाटमा एक महिलाको हत्या गरिएको छ । शुक्रबार बिहान करिब ४ बजेतिर अन्दाजी २८ वर्षीया राजु दमाईको धारिलो घरेलु हतियार प्रयोग गरेर हत्या भएको प्रहरीले जनाएको छ ।
राजुका श्रीमान् कृष्ण दमाईले हत्या गरेको आशङ्कामा उनलाई प्रहरी नियन्त्रणमा राखिएको छ । मृतक राजु र उनका श्रीमानसँगै सुतिरहेको अवस्थामा उनको हत्या भएको भए पनि श्रीमान कृष्ण आफू ट्वाइलेट गएको अवस्थामा श्रीमतिको हत्या अर्कैले गरेको प्रारम्भिक बयानमा बताइरहेको प्रहरीले जनाएको छ ।
उनको घाँटी र टाउकोमा गहिरो चोट लागेको छ । उपचारका लागि डडेल्धुरा अस्पतालमा लगिएको र अस्पताल पुर्याएको केहि बेरमै राजुको मृत्यु भएको तिलताली प्रहरी चौकीका इन्चार्ज सई नरेन्द्र टमटाले बताए । डडेल्धुरा अस्पतालमै पोष्टमार्टम गरेर हिजो नै लास घरमा ल्याएको भए पनि मृतकका माइती पक्षले आजसम्म लास उठाउन दिएका छैनन् ।
घटनाको अनुसन्धान भइरहेको जिल्ला प्रहरी कार्यालयका सूचना अधिकारी इन्स्पेक्टर कर्णबहादुर बोहराले बताए । ‘आशङ्कामा उनका श्रीमानलाई नियन्त्रणमा लिइएको भए पनि जाहेरी आइ नसकेको र अनुसन्धानसमेत भइरहेका कारण कसले हत्या गरेको हो भन्न सकिन्न’, बोहराले भने, ‘पोष्टमार्टमको रिपोर्टसमेत हामी कहाँ आइपुगेको छैन ।’
मृतकका दुई छोरा र एक छोरी छन् ।
प्रतिक्रिया दिनुहोस !
