काठमाडौं : कोरोना (कोभिड १९) भाइरसको संक्रमण त्रासका कारण नियमितरुपमा कक्षामै उपस्थित भएर पढाइ सञ्चालन गर्न नसकिने भएपछि त्रिभुवन विश्वविद्यालयले अनलाइनमार्फत पढाउने भएको छ ।
अनलाइनमार्फत शैक्षिक गतिविधि सञ्चालन गर्न उसले निर्देशिका समेत जारी गरेको छ । त्रिविले जारी गरेको निर्देशिकामा अनलाइन माध्यमबाट कक्षा सञ्चालनको पूर्व तयारी, कक्षा सञ्चालन तथा निर्देशिका विपरित जाने शिक्षक कर्मचारीलाई कारवाहीको समेत व्यवस्था छ ।
जसअनुसार अनलाइन कक्षा चलाउने हरेक विभाग, स्कुल तथा क्याम्पसले दु्त गतिमा चल्ने इन्टरनेट, फोन, ल्यापटपको व्यवस्था गर्नुपर्नेछ । यस्तो सुविधाको पहुँच भएका शिक्षक तथा विद्यार्थीको अवस्थ कस्तो छ भन्ने विषयमा एक साताभित्रमा तथ्यांक संकलन गर्ने तथा उनीहरुलाई के कस्तो तालिम तथा सहयोगको आवश्यकता पर्छ लगायतको विषयमा तयारी गर्नुपर्ने निर्देशिकामा छ । यसको व्यवस्थापन सम्बन्धित विभाग, स्कुल तथा क्याम्पसले गर्नुपर्ने निर्देशिकामा छ ।
आवश्यक तयारीपछि सम्बन्धित विभाग, स्कुल तथा क्याम्पसको निर्देशन र नियन्त्रणमा रहनेगरी पढाइ सञ्चालन हुनेछ । यसरी सञ्चालन गरिएको कक्षालाई नियमित पाठ्यभार सरह गणना गरिने त्रिविले जनाएको छ । पढाइ प्रभावकारी बनाउन हरेक कक्षामा एकजना विद्यार्थी प्रतिनिधि तोकिने, हरेक शिक्षक तथा विद्यार्थीले अनलाइनमार्फत हाजिरीको रेकर्ड राख्नुपर्ने छ ।
विश्वविद्यालयको पूर्णकालित शिक्षकले सम्बन्धित विभाग, स्कुल तथा क्याम्पस बाहेक अन्यत्र हुने अनलाइन कक्षामा सहभागी भएर पढाउने पाउने छैन । यदि पढाएको पाइएमा कारवाही गरिने त्रिविले जनाएको छ ।
निर्देशिकामा नै जारी गरेर त्रिविले अनलाइनमार्फत पढाइ सञ्चालन गर्ने तयारी गरेपनि यो सबै विद्यार्थीको पहुँचमा नरहेको भन्दै विद्यार्थीले नै गुनासो गरेका छन् । त्रिवि अन्तर्गतकै केही क्याम्पसले स्वतस्फूर्त रुपमा यसअघि नै अनलाइनमार्फत पढाइ सञ्चालन गरिरहेका छन् । तर यस्तो पढाइमा मुस्किलले पचास प्रतिशत मात्र विद्यार्थी सहभागी हुने गरेको पब्लिक युथ क्याम्पसका प्रमुल बलराम थापाले जानकारी दिए । यो क्याम्पसले दुई साताअघिदेखि नै अनलाइनमार्फत पढाइ सञ्चालन गरिरहेको छ । 
प्रतिक्रिया दिनुहोस !
