लकडाउनमा भारतबाट मोटरसाइकलमा आएका हुण्डी कारोबारी पक्राउ

वीरगन्ज : लकडाउनमा नाका बन्द रहेको भएपनि प्रहरीले भने मुख्य नाका वीरगन्ज रौक्सल नाकाहुँदै भारतबाट मोटरसाइकलमा हुण्डीको रकम लिएर आएको भन्दै एकजनालाई पक्राउ गरेको छ । 

लकडाउन सुरु भएदेखि नै नेपाल भारत दुवै देशको नाका सिल गरी आवागमन ठप्प पारेको छ । नाकामा दुवै देशका सुरक्षाकर्मीको २४ सै घण्टा पहरा छ ।  तर, प्रहरीले भने बुधबार रक्सौलबाट हुण्डीको रकम लिएर मोटरसाइकलमा प्रवेश गरेका वीरगन्ज १६ इनर्वाका २९ वर्षीय लालबाबु कुमार यादवलाइ पक्राउ गरिएको जनाएको छ । 

रक्सौलबाट वीरगन्ज भन्सार नाकाहुँदै ना ६२ प ९५७१ नंबरको मोटरसाइकलमा आएका यादवलाई वीरगन्जको रजत जयन्ती चोकबाट पक्राउ गरिएको जिल्ला प्रहरी कार्यालय पर्साले जनाएको छ ।

यादवको साथबाट हुण्डीको ११ लाख ५० हजार रुपैयाँ बरामद पनि भएको प्रहरी नायव उपरीक्षक वीरेन्द्रबहादुर शाहीले जानकारी दिए । रक्सौलबाट आउँदै गरेको मोटरसाइकल बुधबार दिउँसो रजतजयन्ती चोकमा रोकेर चेकजाँच गर्दा यादवले बोकेको झोला भित्र रहेको श्रोत खुल्न नसकेको ११ लाख ५० हजार रुपैयाँ बरामद भएको उनले बताए ।
 
हुण्डीको रकमसहित पक्राउ परेका यादवलाई जिल्ला प्रहरी कार्यालय पर्साको हिरासतमा राखेर थप अनुसन्धान भइरहेको उनले जानकारी दिए । लकडाउनमा नाकामा दुवै देशका सुरक्षाकर्मीले २४ सै घण्टा पहरा दिइरहेको अवस्थामा रक्सौलबाट दिउँसै मोटरसाइकलमा यादव कसरी वीरगन्ज छिरे भन्ने प्रश्नमा प्रहरी नायव उपरीक्षक शाहीले भने, ' पैसा पारि भारतकै हो भन्ने हाम्रो सुत्रले जनाएको छ, यादव मुख्य नाका नभइ चोर बाटोबाट वीरगन्ज छिरेको हुन सक्छन् , यस विषयमा अनुसन्धान भइरहेको छ।'