कोरोना कहर : सीमामा सयौं नेपाली अलपत्र, कोही लुकेर आउँदै, कोही बाटो कुर्दै
वैशाख ३०, २०७७ मंगलबार १०:५७:०
बुटवल : कोरोनाको नयाँ केन्द्र बनेको प्रदेश ५ का अधिकांश संक्रमित भारतबाट हालै नेपाल प्रवेश गरेका हुन् । सीमामा अलपत्र रहँदा समेत सरकारले उद्धार नगरेपछि उनीहरु लुकेरै नेपाल प्रवेश गरेका थिए । नेपाल आएपछि क्वारेन्टाइनमै बसेका ३० जनामा कोरोना देखिएको हो ।
प्रदेश ५ का चार जिल्लामा संक्रमितको संख्या ५२ पुगेको छ । रुपन्देहीका ७, कपिलवस्तुका २१, बाँके र बर्दियाका एक एक जना लुकेर नेपाल छिरेका हुन् । सोमबार मात्रै २४ जनामा कोरोना देखिएको थियो ।
पछिल्लो एक साताको अवधिमा कपिलवस्तुमा मात्रै करिब ९ जना नेपाल प्रवेश गरेको अनुमान छ । तीमध्ये ३ सयको हाराहारीमा मात्रै क्वारेन्टाइनमा बसेका छन् । अन्य कहाँ छन् भन्ने अत्तोपत्तो छैन । नभेटिएकाले कोरोना फैलाउने चिन्ता थपिएको छ । कपिलवस्तुका नाका हुँदै रुपन्देही, नवलपरासी र दाङ घर भएका नागरिकहरु भित्रिएका छन् । रुपन्देहीका केहीलाई मात्रै क्वारेन्टाइनमा राखिएको छ ।
कोरोना संक्रमितको संख्या बढ्दै गएपछि प्रदेश ५ मा त्रास छाएको छ । संक्रमित बिरामीमध्ये कपिलवस्तु र रुपन्देहीका बुटवलको कोरोना विशेष अस्पतालमा रहेका छन् । उनीहरुको स्वास्थ्य अवस्था सामान्य रहेको प्रदेश स्वास्थ्य निर्देशक डा. बिनोद गिरीले जानकारी दिए ।
सयौं सीमामा अलपत्र
भारतमा रेल र बस सेवा सुरु भएपछि सयौं नेपाली सीमामा आएका छन् । तर नेपाल प्रवेश गर्न पाएका छैनन् । लुकेर छिर्न सक्ने मात्रै भित्रिएका छन् । कतिपय नाकामा सुरक्षाकर्मीले एक हजारदेखि पन्ध्रसय रुपैयाँ लिएर पस्न दिने गरेको बताइएको छ ।
सोमबार साँझसम्म कपिलवस्तुको सीमा क्षेत्रमा मात्रै २२ सय नेपाली आएका छन् । शनिबारसम्म सीमानामा १३ सय ५५ जना थिए । सोमबार दिउँसोसम्म संख्या बढेर २ हजार २ सय भन्दा माथि पुगेको छ ।
कपिलवस्तुको कृष्णनगरमा ४ सय ३०, भील्मी-कुशहवा ४ सय ८९, हरदौना ३ सय ८, मर्यादपुर ४ सय ९३, चाकरचौडा २ सय १९, हथिहवा १ सय ६, विजयनगर ९२ जना नेपालीहरु दशगजामै बसिरहेका छन् ।
सुनौलीबाट उद्धारको तयारी
रुपन्देहीको सिमावर्ती सहर सुनौलीमा रहेका नेपालीलाई उद्धार गरी क्वारेन्टाइनमा राख्ने तयारी गरिएको छ । रुपन्देहीको तिलोत्तमा नगरपालिकाका मेयर बासुदेव घिमिरेले अलपत्रको उद्धार गर्न थालिएको बताए । 'उद्धार गरेर तोकिएको अवधि क्वारेन्टाइनमा राख्छौं, उनले भने ।
भारतीय सहर नौतुनवामा ११ सयभन्दा धेरै नागरिक नेपाल आउने प्रतिक्षामा छन् । उनीहरुलाई उद्धार गर्न थालिएको हो ।
प्रतिक्रिया दिनुहोस !
