त्रासमा वीरगन्ज (फोटो फिचर)

वीरगन्ज : एकै दिन थप ५७ कोरोना संक्रमित भेटिएपछि पर्सा जिल्लामा सदरमुकाम वीरगन्जसहित ग्रामीण भेगको जनजीवन त्रसीत बनेको छ । पर्सामा मङ्गलबार मात्रै कोरोनाका ५७ संक्रमित भेटिएका हुन् । योसँगै पर्सामा संक्रमितको संख्या ८२ पुगेको छ ।

 
संक्रमितको कन्टयाक्ट ट्रेसिंग गरी थुप्रै शंकास्पद व्याक्तिको स्वाब परीक्षणका लागि काठमाडौं पठाइएको र उनीहरूको रिपोर्ट आउन बाँकी नै रहेकाले संक्रमितको संख्या अझ बढ्न सक्ने अनुमान चिकित्सकहरुको छ । मङ्गलबार ५७ जना संक्रमित भेटिएपछि कोरोना महामारी रोकथाम तथा नियन्त्रणका लागि पर्सामा मङ्गलबार बेलुकी ८ बजेदेखि नै निषेधाज्ञा जारी गरिएको छ ।

 
लकडाउनले मात्रै संक्रमण नियन्त्रणमा आउन नसकेको निष्कर्ष निकाल्दै स्थानीय प्रशासनले मङ्गलबार बेलुकी ८ बजेदेखि जेठ ५ गतेसम्मका लागि निषेधाज्ञा जारी गरेको हो । लकडाउन र निषेधाज्ञालाई अझ कडाइका साथ लागु गर्न मङ्गलबार बेलुकीदेखि नै नेपाली सेना पनि परिचालन गरिएको छ । 

पर्साको वीरगन्ज महानगर र ग्रामीण भेगका हरेक चोक-चोकमा नेपाल प्रहरी र सशस्त्र प्रहरीको पनि तैनाथी बढाइएको छ । निषेधाज्ञा लागु गरिएसँगै सुरक्षाकर्मी र स्वास्थ्यकर्मीले प्रयोग गर्नेबाहेक अन्य सबै निजी तथा सार्वजनिक सवारी साधन सन्चालनमा पूर्ण रुपमा रोक लगाइएको छ । 

जसका कारण वीरगन्ज महानगरका सडक, टोल र चोकहरु बुधबार बिहानैदेखि सुनसान छन् । महानगरका भित्री टोलका चोक चोकमा स्थानीय आफैँले बासको ढाट राखेर आवागमन रोकेका छन् । मङ्लबार २ जना पत्रकारमा पनि संक्रमण फेला परेपछि त्रसित बनेका वीरगन्जका अधिकांश पत्रकारले बुधबार आफैँ नारायणी अस्पतालमा पुगेर पिसिआर परीक्षणका लागि स्वाबको नमुना दिएका छन् ।