वीरगन्जमा स्वास्थ्यकर्मी पनि संक्रमित

वीरगन्ज :  पर्साको वीरगन्जमा स्वास्थ्यकर्मीमा पनि कोरोना संक्रमण भेटिएको छ ।बुधबार बेलुकी वीरगन्जमा कोरोना संक्रमण पुष्टि भएका थप ३ संक्रमितमध्ये एक जना स्वास्थ्यकर्मी पनि रहेको पर्साका सहायक प्रमुख जिल्ला अधिकारी ललीतकुमार बस्नेतले पुष्टि गरेका हुुन् ।

उनका अनुसार बुधबार बेलुकी संक्रमणको पुष्टि भएका वीरगन्जका ३ जनामध्ये एकजना नारायणी अस्पतालमा कार्यरत ३६ वर्षीया स्टाफ नर्स हुन् । अस्पतालको पेडयाक्ट्रिक विभागमा कार्यरत उनी नारायणी अस्पतालको आइशोलेशन वार्डमा उपचाररत कोरोना संक्रमितहरुको उपचारमा बैशाख १४ गतेदेखि एक हप्ता खटिएकी थिइन् । त्यसपछि भने उनी होम क्वारेन्टाइनमा बसेकी थिइन् । 

सहायक प्रजिअ बस्नेतका अनुसार बुधबार बेलुकी ती स्टाफ नर्ससंगै वीरगन्ज मुर्लीका १५ वर्षीय एक किशोर र वीरगन्ज १६ इनर्वाका ७४ वर्षीाय वृद्ध पुरुषमा संक्रमण भेटिएको हो । 

योसंगै पर्सा जिल्लामा संत्रमितको संख्या ८५ पुगेको छ । बुधबार बेलुकी संक्रमण पुष्टि भएका तीनै जनाको स्वास्थ्य अवस्था सामान्य रहेको नारायणी अस्पतालका चिकित्सक डाक्टर उदय नारायण सिंहले जानकारी दिए ।