सर्लाहीकी कोरोना संक्रमित युवतीको परिवारका सदस्यको स्वाब संकलन

सर्लाही : सर्लाहीको रामनगर गाउँपालिकामा २१ जनाको थ्रोट स्वाब संकलन गरिएको छ । शनिबार साँझसम्ममा संकलन गरिएका स्वाबको पीसीआर विधिबाट परीक्षण गराउन काठमाडौंस्थित राष्ट्रिय जनस्वास्थ्य प्रयोगशाला टेकु पठाइएको रामनगर गाउँपालिकाका अध्यक्ष कृष्णप्रसाद बर्माले दिए ।

रामनगरबाट दुई साताअघि काठमाडौं गएकी १८ वर्षीया युवतीमा कोरोना संक्रमण देखिएपछि उनका यहाँ रहेका परिवारका सदस्य र गाउँपालिकाको क्वारेन्टाइनमा रहेका गरी जम्मा २१ जनाको स्वाब संकलन गरिएको हो ।

परिवारका सदस्यसँग सोधपुछ गर्दा फागु पूर्णिमा (होली) मनाउन चैत ७ गते गाउँ आएकी युवती वैशाख २२ गते मोटरसाइकलमा काठमाडौं गएको खुलेको रामनगर गाउँपालिका ४ का वडाध्यक्ष रामनरेश महतोले बताए ।

युवतीसँगै उहाँका दुई बहिनी, एक भाइ र गाउँबाट काठमाडौं चल्ने बसमा काम गर्ने दुईजना मोटरसाइकलमा काठमाडौं गएका थिए । होली मनाउन गाउँ आएकी सङ्क्रमित युवतीको परिवार काठमाडौं नै बस्छन् । रामनगरमा युवतीका हजुरबुवा, हजुर आमा, काका, काकी र काका काकीका छोराछोरीसहित १४÷१५ जना बस्दै आएका छन् । उनीहरुलाई अहिले क्वारेन्टाइनमा राखिएको छ ।

सर्लाहीका प्रमुख जिल्ला अधिकारी मोहनबहादुर जिसीले सङ्क्रमित युवतीका यहाँ हुँदा हिँडडुल नगरी घरमै बसेको पाइएकाले खासै जोखिम नदेखिएको बताए । जिल्लाको दक्षिण-पश्चिम भेगस्थित बाग्मती नदीको किनारमा पर्ने रामनगर गाउँपालिका सदरमुकाम मलङ्गवादेखि झण्डै २२ किलोमिटर टाढा पर्छ ।

त्यहाँ लकडाउन अर्थात बन्दाबन्दीको पालना नभएको गुनासो बारम्बार आइरहेको थियो । गाउँका मानिस जथाभावी हिँडडुल गर्ने र गाउँपालिकाभित्रका सिसौट, खैर्बा र ईनर्वा बजार निकै भीडभाड गरेर नियमितजसो लाग्दै आएको स्थानीय शिक्षक रामपवित्र साहले बताए ।

सर्लाहीमा हालसम्म धनकौल गाउँपालिका-५, हरकठवागोठका १४ वर्षीय बालक, हरिपूर्वा नगरपालिका-३, धनकौल पूर्वारीका मानसिक सन्तुलन ठीक नभएका ४५ वर्षीय पुरुष र रामनगर गाउँपालिका-४, बहुअर्वाकी १८ वर्षीया युवती गरी तीन जनामा कोरोना सङ्क्रमण पुष्टी भएको छ । तीमध्ये बालकको वीरगञ्ज र पुरुषको जनकपुरमा उपचार भइरहेको छ भने युवती काठमाडौंमै छिन् ।

गत मङ्गलवार हरिपूर्वाका पुरुषमा संक्रमण पुष्टि भएपछि बुधबार उहाँको परिवारका सदस्य, सम्पर्कमा आएका व्यक्ति, केही छरछिमेकी र नगरपालिकाले क्वारेन्टाइनमा राखेका चारजना समेत गरी ३० जनाको थ्रोट स्वाब संकलन गरेर परीक्षणका लागि जनकपुर पठाइएको छ । उनीहरुको पनि रिपोर्ट आउन बाँकी छ ।