नेपालमा बनेको पुल नेपालीले प्रयोग गर्न पाएनन्

वीरगन्ज : पर्साको ठोरी स्थित ठुटे खोलामा निर्माण गरिएको पुल, भारतीयको अवरोधका कारण नेपालीले नै प्रयोग गर्न पाएका छैनन् । हुलाकी राजमार्गमा पर्ने ठोरी गापाको वडा नम्बर २ र ३ लाई जोड्ने ठुटे खोलामा ६ करोड ९७ लाख २१ हजार रुपैयाँको लागतमा एक सय दुई मिटर लम्बाइको पुल निर्माण गरिएको छ ।तर पुल निर्माण भएको २ वर्ष बितिसक्दा पनि भारतीयको अवरोधका कारण नेपालीले प्रयोग गर्न नपाएका हुन् ।

नविनिर्मित पुलको पूर्वतर्फको एप्रोच सडक ( पुलसँग हुलाकी सडक जोड्ने बाटो)  भारतीय पक्षको अवरोधका कारण बन्न नसक्दा ठुटे खोलाको नवनिर्मित पुल बनेको २ वर्षसम्ममा पनि प्रयोगमा आउन नसकेको हो । 

 
सीमावर्ती भारतीय गाँउ धमौरा र सुभद्राका स्थानीयाले ठुटे खोलाको कुलो पुरेर एप्रोच सडक बनाउन नदिने भन्दै विवाद खडा गरेका कारण ठेकेदार कम्पनीले एप्रोच सडकको काम गर्न पाएको छैन । भारतीय गाँउ धमौरा र सुभद्रका स्थानीयले नेपाली भूमीमा बग्ने ठूटे खोलाको मुहान प्रयोग गरी वर्षौदेखि दुईवटा कुलो सिँचाइको लागि प्रयोग गर्दै आइरहेका छन् । कुलो पुरेर एप्रोच सडक बनाउँदा सिँचाइ गर्न नपाउने भन्दै भारतीले कुलो पुर्न नदिएका हुन् । 
 
तर ठोरीका स्थानीयले भने पुलको एप्रोच सडक निर्माणका लागि वर्षौदेखि आफूहरुले प्रयोग गर्दै आइरहेको कुलो पनि पुर्न दिन सहमती दिइसकेका छन्  । नवनिर्मित पुलको आडमै दुई वटा  कुलो सञ्चालन गर्न दिँदा पूल जोखिममा पर्ने भन्दै कुलो पुरेर नै एप्रोच सडक बनाउनुपर्ने ठोरीका स्थानीयको अडान छ । भारतीय पक्षले भने साविक स्थानबाटै ह्यूमपाइप राखेर कुलोको पानी आफ्नो भूमीमा लैजान पाउनुपर्ने अडान राख्दै आएका छन् ।
  
ठोरीका स्थानीय रामशरण लाछिानेले भारतीयले भने अनुसार ह्यूमपाइप राखेर कुलो प्रयोग गर्न दिँदा पुलको संरचना नै जोखिममा पर्ने बताए । उनले भने,‘पुल बनेको २ वर्ष भइसक्यो तर एप्रोच सडक बन्न नसक्दा बस, ट्रक, टयाक्टर र कार पुलबाट अहिलेसम्म गुड्नै पाएका छैनन् ।'

 पुलसँग सडक नजोडिएपछि जोखिम मोलेर सवारी साधनहरु पुल मुनिको खोलैखोला चलाउन चालकहरु बाध्य रहेको उनले बताए । एक त पुलको निर्माण सुरु गर्ने बेला नै एसएसबीले सीमाको विवाद झिकेर सात वर्षसम्म पुलको काम नै सुरु गर्न दिएन', लामिछानेले भने, 'विवादपछि पहिलेको स्थानबाट ५ सय मिटर नेपालतर्फ सारेर पुल बन्यो तर फेरि भारतीय पक्षले अर्को बखेडा झिकेका कारण २ वर्ष पहिले बनिसकेको पुल प्रयोग गर्नबाट नेपाली बन्चित छन् ।' 
 
पुल बनिसक्दा पनि प्रयोगमा नआउदा वर्षामा ठूटे खोलामा बाढी आएका बेला ठोरी र सदरमुकाम वीरगन्जको सडक सम्पर्क नै विच्छेद हुने गरेको स्थानीय रमेश शर्माले बताए । ठोरी गाँउपालिकाका प्रवक्ता एंव वडा नम्बर २ का वडा अध्यक्ष रामप्रकाश कुवँरले पनि भारतीयको विवादका कारण नवनिर्मित पुल बनेको २ वर्ष बित्दा पनि सन्चालनमा आउन नसकेको बताए । 
 
समस्या सामधानका लागि भारतीय सीमावर्ती गाँउका जनप्रतिनिधिसँग छलफल गर्दा उनीहरु आफ्नो अडानबाट पछि नहटेको उनले बताए । ठोरी  गाँउपालिकाका अध्यक्ष पदमलाल श्रेष्ठले भने दुइ देशको सीमाको विषय भएकाले स्थानीय तहले केही गर्न नसकेको बताए । 'यस विष्यामा हामीले सिडिओ , मन्त्रालय सबै निकायमा पटक-पटक ध्यानाकर्षण गराइ सकेका छौं', श्रेष्ठले भने, ‘समस्या देखिए यता पर्सामा ३-४ जना सिडिओ फेरिइसकेका छन् तर समस्या जहाँको त्यहीँ छ ।' 

भारतीयकै अवरोधले पुल निर्माण कार्य ७ वर्ष रोकिएको थियो । 

भारतीयको अवरोधका कारण , ठुटे खोलामा पुलको निर्माण कार्य नै सात वर्षसम्म रोकिएको थियो । नेपाल भारत सीमामा अवस्थित ठुटे खोलामा पुल निर्माणका लागि सर्वे गरिएको नेपाली भूमी भारतीय सीमा सुरक्षा बल (एसएसबी) ले भारतीय भूमी भन्दै अवरोध गरेपछि सात वर्षसम्म त पुलको निर्माण कार्य नै सुरु हुन सकेको थिएन । 
 
पुल निर्माणका लागि सडक विभागले २०६७ साल जेठ ४ गते नै अमर एण्ड मृत सन्जिवनी निर्माण सेवा कम्पनीसँग ठेक्का सम्झौता गरे पनि भारतीय एसएसबीले सीमाको विवाद झिकेका कारण सात वर्षसम्म पुलको निर्माण कार्य नै रोकिएको थियो । २०७४ साल बैशाखमा नेपाल र भारतका सीमा अधिकारी बीच भएको वार्तामा सीमा विवादका बारेमा सहमती भएपछि मात्र पहिले सर्वे गरिएकै स्थानमा पुल निर्माण गरिएको थियो । उक्त पुल निर्माण कार्य २०७५ जेठमा  सकिएको थियो ।