वीरगन्ज : भारतमा लकडाउन खुकुलो भएसँगै नेपाल फर्किनेको संख्या बढ्न थालेपछि पर्सामा स्थापना गरिएका क्वारेन्टाइनको क्षमता बढाइएको छ । पर्सा जिल्लाका १४ वटै स्थानीय तहमा गरी कुल २५ स्थानमा क्वारेन्टाइन स्थापना गरिएको छ । ती २५ वटा क्वारेन्टाइनमा १ हप्ता पहिलेसम्म ४ सयलाई मात्र राख्न सक्ने व्यवस्था गरिएको थियो ।
तर भारतबाट नेपाल फर्कनेको संख्या बढ्न थालेपछि पर्सामा रहेका क्वारेन्टाइनमा पूर्वाधार र अन्य आवश्यक बन्दोबस्ती गरेर अहिले १ हजार जना राख्न सक्ने बनाइएको पर्साका सहायक प्रमुख जिल्ला अधिकारी ललीतकुमार बस्नेतले बताए । भारतमा लकडाउन खुकुलो गरेर रेल र बस सेवा सुचारु गरिएसँगै रोजगारी वा अन्य कामका शीलशीलामा रहेका नेपाली फर्कने क्रम बढेकोले त्यसलाई मध्य नजर गरेर क्वारेन्टाइनको क्षमता बढाइएको उनले बताए ।
३ दिन पहिलेसम्म क्वारेन्टाइनमा २४७ जना मात्र रहेकोमा बुधबारसम्म त्यो संख्या बढेर ४ सय पुगेको उनले बताए ।
पर्साका क्वारेन्टाइनमा अहिले ३१ महिला र ३ सय ६९ पुरुष रहेको जानकारी दिंदै उनले भने, ‘४ सयमध्ये अधिकांश भारतबाट आएका नै हुन् । पर्साका १४ वटै स्थानीय तह भारतसँग सीमा जोडिएका छन् । पर्साको १०७ किलोमिटर सीमा भारतको बिहारसँग जोडिएको छ ।'
नेपालबाट भारत प्रवेश गर्ने आधिकारिक नाका पर्सामा वीरगन्ज, भिस्वा, प्रसौनीभाठा, भिस्वा, जानकीटोला र ठोरी गरी ६ वटा छन् । यी ६ नाका बाहेक खुल्ला सीमाका कारण खेत , नहर र जंगलको बाटो हुँदै पनि नेपाल भारत आउजाउ हुने गरेको छ । भारतबाट पर्साको नाका हुँदै नेपाल प्रवेश गर्ने मध्ये पर्साका बासिन्दालाई सम्बन्धित पालिकाको क्वारेन्टाइनमा राख्ने गरिएको छ ।
अरु जिल्लाका नेपालीलाई भने सम्बन्धित जिल्लाको स्थानीय प्रशासनसँग समन्वय गरेर उनीहरुकै जिल्लामा पठाइने गरिएको र लिएर जान नमान्नेलाई भने पर्साकै क्वारेन्टाइनमा राख्ने तयारी गरिएको सहायक प्रमुख जिल्ला अधिकारी बस्नेतले बताए ।
पर्सामा रहेका क्वारेन्टाइन भने सरकारले तोकेको मापदण्ड अनुसारको भने नभएको सहायक प्रमुख जिल्ला अधिकारी बस्नेतले स्वीकारे ।
'जिल्लाका २५ वटै क्वारेन्टाइन विद्यालय र क्याम्पसमा स्थापना गरिएका छन् । अधिकांश क्वारेन्टाइनमा सकारले तोकेको मापदण्ड पुगेको छैन , केही समस्या छ', उनले भने,‘पालिकाहरुले साधन श्रोतले भ्याएसम्म गरेका छन् ।'
प्रतिक्रिया दिनुहोस !
